Momente tensioni live në emisionin italian “Domenica In”, ku marrëdhënia mes showgirl-it të njohur Valeria Marini dhe nënës së saj, Gianna Orrù, u shfaq në mënyrë të papritur dhe emocionale para publikut.
Pas një interviste të shkurtër me zonjën Gianna, moderatorja Mara Venier ftoi në studio Valerian. Por në momentin kur ajo iu afrua për ta përshëndetur me një puthje, nëna e saj reagoi ftohtë dhe e refuzoi hapur: “Nuk bëhet kështu, nuk është e drejtë,” tha ajo, duke lënë të habitur publikun dhe të bijën.
Valeria, në përpjekje për të sheshuar situatën, kërkoi falje: “Nëse kam gabuar, të kërkoj ndjesë.” Ajo i kërkoi gjithashtu që ta zhbllokonte nga telefoni, por përgjigjja e zonjës Gianna ishte po aq e prerë:
“Gjëra private nuk duhen bërë publike, ti i ke shpërndarë gjithandej.”
Reagimi i ftohtë i nënës dhe ndjesa e pafuqishme e Valerias ndezën menjëherë rrjetet sociale, ku shumë komentues kritikuan qëndrimin e nënës, duke e konsideruar sjelljen e saj “të ashpër” dhe “të ftohtë” për një moment kaq publik dhe emocional.
