E ardhmja e Julián Álvarez vazhdon të mbetet një nga çështjet më të nxehta të merkatos, ndërsa në Argjentinë janë të bindur se sulmuesi do të largohet nga Atlético Madrid.
Mariano Dayan, drejtori i “Diario Olé”, deklaroi për “El Larguero” se situata është bërë tepër e komplikuar dhe se një transferim gjatë kësaj vere duket skenari më i mundshëm.
“Është një situatë problematike. Julián dëshiron të largohet, Barcelona është e interesuar dhe ka edhe klube të tjera pas tij. Ndjesia jonë është se do të përfundojë duke u larguar nga Atlético”, u shpreh Dayan.
Sulmuesi është rikthyer në stërvitje dhe pritet të zhvillojë një takim me Diego Simeonen, i cili mund të jetë vendimtar për të ardhmen e tij.
Barcelona mbetet një nga destinacionet e mundshme, por marrëdhëniet e tensionuara mes dy klubeve e komplikojnë operacionin. Sipas gazetarit argjentinas, në fund Atlético mund të detyrohet të pranojë një “zgjidhje emergjente”, pasi nuk dëshiron të mbajë në skuadër një lojtar që kërkon largimin.
