Euro ka rënë në nivelin më të dobët në më shumë se një vit kundrejt një dollari të fuqizuar, ndërsa investitorët vënë bast se rënia e çmimeve të naftës dhe shenjat e dobësimit të ekonomisë e bëjnë më pak të mundshme që Banka Qendrore Evropiane të vijojë me rritje të tjera të normave të interesit.
Monedha e përbashkët, për të cilën analistët e Wall Street kishin pritur të arrinte në 1.20 dollarë këtë vit, ndërsa investitorët rivlerësonin ekspozimin e tyre ndaj dollarit, ka rënë me 2.6% deri tani këtë muaj, në 1.135 dollarë, niveli më i dobët që nga fillimi i qershorit 2025.
Rënia ka ardhur pasi marrëveshja SHBA-Iran për të rikthyer flukset e naftës përmes Ngushticës së Hormuzit zbut ashpërsinë e një goditjeje inflacioniste, e cila tashmë e kishte shtyrë BQE-në të rriste kostot e huamarrjes këtë muaj.
Në të njëjtën kohë, të dhënat e fundit ekonomike tregojnë për një goditje ndaj ekonomisë nga periudha tremujore e çmimeve të larta të energjisë, duke i bërë investitorët ngurrues të rikthehen te bastet optimiste për euron që kishin në fillim të vitit.
“Ekonomia e Eurozonës është ngadalësuar si përgjigje ndaj goditjes nga çmimet e energjisë,” tha Lee Hardman, ekonomist i lartë për valutat në MUFG.
“Kombinimi i rritjes më të dobët në Eurozonë dhe çmimeve më të ulëta të energjisë po ndihmon në lehtësimin e presionit mbi BQE-në për të rritur më tej normat.”
Euro ishte forcuar ndjeshëm kundrejt dollarit në fillim të këtij viti, duke përfituar nga ftohja e interesit të investitorëve për monedhën amerikane, ndërsa presidenti i SHBA-së, Donald Trump, ndiqte atëherë një seri lëvizjesh politike që përshkruheshin si “kaotike dhe të improvizuara”.
Megjithatë, dollari rifitoi terren dhe euro ra pasi konflikti SHBA-Iran nisi në fund të shkurtit, duke nxitur një rritje të fortë të çmimeve të naftës që kërcënoi të ngadalësonte rritjen ekonomike në vendet evropiane që varen nga importet e energjisë.
Tashmë investitorët po reagojnë ndaj shenjave të dobësimit ekonomik. Indekset e menaxherëve të blerjeve (PMI) për Eurozonën treguan të martën tkurrje të aktivitetit ekonomik, ndërsa presidentja e Bankës Qendrore Europiane (BQE), Christine Lagarde, deklaroi këtë javë se të dhënat e fundit ekonomike nuk kërkojnë një “përgjigje më të fortë të politikës monetare në këtë fazë”, pas rritjes së fundit të normave të interesit.
Ndërkohë, tregtarët kanë shtuar bastet në favor të dollarit pas qëndrimit më të ashpër të javës së kaluar nga Rezerva Federale, i cili rriti pritshmëritë për rritje të mëtejshme të normave të interesit dhe forcoi tërheqjen relative të monedhës amerikane.
Euro ka humbur gjithashtu 1% kundrejt sterlinës këtë muaj, duke iu afruar nivelit më të ulët që nga gushti i vitit të kaluar.
Megjithatë, rënia më e madhe ndaj dollarit pasqyron forcimin e gjerë të monedhës amerikane, pasi Rezerva Federale është zotuar të frenojë inflacionin, i cili ka kaluar mbi 4%, në kushtet e një ekonomie që vazhdon të tregojë qëndrueshmëri.
Banka JPMorgan njoftoi të hënën se ka ulur objektivin për euron nga 1.13 dollarë në 1.10 dollarë, duke përmendur një kombinim të “rritjes ekonomike më të qëndrueshme, inflacionit të vazhdueshëm dhe elementeve të përjashtueshmërisë amerikane”.
Tregjet vazhdojnë të parashikojnë plotësisht një rritje prej 0.25 pikë përqindjeje të normave të interesit nga Banka Qendrore Europiane deri në fund të vitit, por gjasat për një rritje të dytë kanë rënë nga 50% në 20%, sipas treguesve të tregut të swap-eve.
Analistët e Capital Economics vlerësojnë se BQE mund të mos ketë nevojë për më shumë se një rritje të normave të interesit. Ata presin që inflacioni në Eurozonë të bjerë nga mbi 3% në maj në objektivin prej 2% të bankës qendrore deri në fund të vitit 2027.
“Ne mendojmë se inflacioni i përgjithshëm është tashmë pranë kulmit të tij, pasi inflacioni i energjisë pritet të bjerë, ndërsa rritjet e çmimeve të ushqimeve dhe inflacioni bazë do të jenë të kufizuara”, shkruajnë analistët, duke shtuar se efektet dytësore mbi rritjen e pagave pritet të jenë “minimalë”./MONITOR
