José Mourinho ende nuk është prezantuar zyrtarisht si trajner i Real Madrid, por ka nisur të japë sinjale të qarta për projektin e tij të ri në Madrid.
Pas intervistës për Vanity Fair, tekniku portugez ishte i ftuar në podcastin “Beast Mode” të ish-futbollistit Adebayo Akinfenwa, ku foli për mënyrën si e sheh rikthimin te madrilenët.
Mourinho hodhi poshtë zërat se mund të largojë disa nga yjet e skuadrës për shkak të problemeve të sezonit të kaluar.
“Kam lexuar komente se José Mourinho do të vijë dhe do të largojë disa nga lojtarët më të mirë. Jo! Unë i dua ata lojtarë. Dua më të mirët”, u shpreh portugezi.
Ai nuk përmendi emra konkretë, por mesazhi u pa si një sinjal për lojtarë si Vinicius, Mbappé, Bellingham, Valverde apo Tchouaméni, të cilët pritet të jenë pjesë e rëndësishme e projektit të tij.
Mourinho theksoi se detyra e tij është të ndërtojë një skuadër të bashkuar dhe të shmangë problemet e së kaluarës. Sipas tij, një lojtar i madh duhet të jetë i fortë teknikisht, fizikisht dhe mendërisht, por mbi të gjitha të dijë të luajë për ekipin.
Trajneri portugez pritet ta nisë zyrtarisht punën me Real Madrid më 13 korrik, kur skuadra do të fillojë përgatitjet për sezonin e ri.
