Luka Modric ka folur për rikthimin e José Mourinhos te Real Madridi dhe ndryshimin që, sipas tij, është parë menjëherë te skuadra. Në një intervistë të dhënë për Diario AS, mesfushori kroat u shpreh se portugezi ishte zgjedhja e duhur për stolin madrilen.
“Që në ndeshjet e para shihet një Real Madrid ndryshe, një Real Madrid i frikshëm dhe më pëlqen. Mourinho e njeh klubin, është fitues dhe ka një personalitet të jashtëzakonshëm”, deklaroi Modric.
Kroati kujtoi gjithashtu rolin vendimtar të Mourinhos në transferimin e tij nga Tottenham te Real Madridi. Sipas Modric, trajneri portugez i kishte bërë të qartë klubit: “E dua atë ose askënd tjetër”, duke këmbëngulur deri në realizimin e marrëveshjes.
Modric foli edhe për lidhjen e tij të veçantë me Madridin, duke pranuar se shpreson të rikthehet një ditë në klub pas përfundimit të karrierës. “Real Madridi është shtëpia ime dhe do të jetë gjithmonë. Shpresoj të rikthehem një ditë, por dua të jem i dobishëm dhe i rëndësishëm në atë që bëj”, tha ai.
Në intervistën për Diario AS, 40-vjeçari vlerësoi gjithashtu Mbappén, Vinicius dhe Bellingham, ndërsa për Jude theksoi se që në ditën e parë kishte parë diçka të veçantë, jo vetëm në talentin e tij, por edhe në personalitetin dhe aftësinë për t’u kthyer në lider.
