Ministri i Drejtësisë, Toni Gogu, ka komentuar nga ambientet para Kuvendit arrestin shtëpiak të caktuar nga Gjykata e Posaçme ndaj ish-drejtueses së Shërbimit Informativ Shtetëror.
Gogu deklaroi se qeveria e ka marrë përgjegjësinë politike përmes vendimit për largimin e Hysenit nga drejtimi i Shërbimit Informativ të Shtetit.
Sipas ministrit, përgjegjësia penale është individuale dhe për përcaktimin e saj duhet pritur përfundimi i procesit gjyqësor.
“Përgjegjësia politike është marrë, në krye të SHISH ka një drejtues të ri derisa të ketë një drejtues përfundimtar. Përgjegjësia penale është individuale, individët kanë përballë proceseve”, u shpreh Gogu.
Ai shtoi se qeveria ka vepruar për të garantuar funksionimin e institucionit pas akuzave ndaj ish-drejtueses.
“Qeveria e shkarkoi drejtuesin për shkak të akuzës dhe siguroi vazhdimësinë e institucionit. Për sa i përket se çfarë ka ndodhur në institucion duhet të presim të gjithë procesin. Përgjegjësia politike është kur ti merr drejtimin që institucioni të vazhdojë të bëjë punën”, deklaroi ministri.
