Mediat në Itali i kanë kushtuar një artikull kampit të emigrantëve të ndërtuar në Gjadër dhe të administruar nga autoritetet italiane. Pas vendimit të gjykatës që ktheu mbrapsht dy grupet e emigrantëve, qeveritë e dy vendeve duket se kanë vendosur të bëjnë një hap pas.
Deri në një vendim të Gjykatës Evropiane të Drejtësisë, nuk do të ketë dërgesa të tjera emigrantësh. Mediat raportojnë se qeveria e Giorgia Melonit është duke menduar një plan të dytë për të shfrytëzuar kampin e Gjadrit.
Për të justifikuar shpenzimin e bërë, po mendohet që kampet të kthehen në qëndra për mbajtjen e të burgosurve shqiptarë që arrestohen në Itali. Duke qenë se burgjet atje kanë një mbipopullim, mundësia që shqiptarët të vuajnë dënimin në vendin tonë po shihet si opsion.
“Nisur nga ky bashkëpunim, bisedime të vazhdueshme konfidenciale po bëhen lidhur me hipotezën e rizhvillimit të qendrave për emigrantët në burgje, në mënyrë që të lehtësohet sistemi ynë penitenciar, i cili është gjithnjë e më i mbushur me njerëz dhe më pak i menaxhueshëm.
Ideja bazohet në një protokoll efektiv tashmë në përdorim që nga koha e kryeministrave Fatos Nano dhe Silvio Berlusconi, për të mos përmendur që Italia dhe Shqipëria janë përfshirë prej vitesh në marrëveshje ministrore dhe në departamentin e burgjeve, aq sa Italia në të shkuarën ka financuar ndërtimin e dy burgjeve në Shqipëri”, shkruan media Il Tempo.
“Përballë mbipopullimit të burgjeve italiane, që e kalon 130% dhe me gjithnjë e më shumë vetëvrasje të të burgosurve kanë dalë propozimet për të përdorur zonën e Lezhës, në veri të qytetit të dy shqiponjave, për të burgosurit shqiptarë të dënuar në Itali” – citon shkrimi ndër të tjera.
Marrëveshja e nënshkruar vitin e kaluar midis Romës dhe Tiranës parashikonte që Shqipëria të priste deri në 3 mijë emigrantë në vit me një kosto prej të paktën 670 milionë euro për 5 vjet.
