Kylian Mbappe ka folur sërish me emocione për aventurën e tij te Real Madrid, duke e cilësuar transferimin te klubi madrilen si një nga momentet më të rëndësishme të jetës dhe karrierës së tij.
Në një intervistë për GQ France, sulmuesi francez nuk e fshehu krenarinë për faktin që sot mban veshur fanellën e “Los Blancos”, pas një sage të gjatë transferimi që zgjati për disa vite.
Për Mbappe, të luajë për Real Madrid është shumë më tepër sesa një kontratë profesionale. Ai e përshkroi këtë eksperiencë si një privilegj të jashtëzakonshëm dhe si realizimin e një ëndrre të madhe.
“Për mua, të luaj për Real Madrid është si një dhuratë nga Zoti. Është një mundësi për të jetuar pasionin tim, për të marrë pjesë në ndeshjet më të mëdha dhe për të qenë te klubi më i mirë në botë”, deklaroi futbollisti francez.
Sezoni i tij me skuadrën madrilene ka qenë mjaft i rëndësishëm edhe në aspektin statistikor. Deri tani, Mbappe ka zhvilluar 38 ndeshje me Real Madrid, duke realizuar 39 gola dhe duke dhënë 6 asistime.
Deklarata e tij vjen si një tjetër dëshmi e lidhjes së fortë që sulmuesi ka krijuar me klubin dhe me ambientin në Madrid, aty ku synon të shkruajë kapitujt më të mëdhenj të karrierës së tij.
