Vinicius Junior vazhdon të kalojë një moment të vështirë te Real Madrid, ndërsa paraqitja ndaj Leipzigut ka shtuar edhe më shumë debatet rreth formës së brazilianit.
Sulmuesi luajti rreth 70 minuta, por nuk arriti të kompletonte asnjë driblim, një statistikë që bie në sy për një lojtar që e ka ndërtuar lojën e tij mbi shpërthimin dhe aftësinë për të kaluar kundërshtarët.
Forma e Vinicius kontraston edhe me ngritjen e Yan Diomande, i cili ka tërhequr vëmendjen me paraqitjet dhe golat e fundit ndaj Sevillas dhe Leipzigut.
Situata e brazilianit u diskutua në emisionin “El Bar de Sique”, ku pati kritika të forta edhe për mënyrën se si José Mourinho po e menaxhon lojtarin.
José Mari Bakero ishte i drejtpërdrejtë në analizën e tij.
“Ky është çelësi. Po ndryshojnë strukturën psikologjike të një personi që ishte mësuar të sillej në një mënyrë të caktuar, brenda dhe jashtë fushës. Mourinho, me mënyrën e tij më të ngadaltë dhe të kontrolluar, po e vë në gjumë dhe po i heq personalitetin. Kjo po ndikon në paraqitjet e tij. I kanë hequr karburantin që kishte brenda”, deklaroi Bakero.
Edhe Jordi Martí ngriti pikëpyetje mbi përgatitjen e Vinicius gjatë verës, duke theksuar se braziliani humbet shumë nga rrezikshmëria e tij kur nuk është në gjendjen më të mirë fizike.
“Vinicius nuk është Vinicius kur nuk është në maksimum. Një pjesë e madhe e rrezikut të tij vjen nga eksploziviteti dhe vertikaliteti”, u shpreh ai.
Manolo Romero shkoi edhe më tej, duke deklaruar se rinovimi i kontratës së brazilianit ishte një gabim.
Vinicius tashmë duhet të presë për t’u rikthyer në fushë, pasi sipas burimit ndeshja e tij e ardhshme mund të jetë ajo e 21 nëntorit ndaj Celta Vigos në “Santiago Bernabéu”.
