PSG humbet edhe Ousmane Dembélén, i cili pritet të qëndrojë jashtë për rreth tre javë pas dëmtimit muskulor të pësuar ndaj Barcelonës.
Dëmtimi i fituesit të Topit të Artë ka hapur gjithashtu debat rreth mënyrës se si Luis Enrique po menaxhon minutat e francezit.
Sipas “L’Equipe”, Dembélé nuk është gjithmonë dakord me pushimet e shpeshta që i jep trajneri. Sulmuesi beson se qëndrimi për shumë kohë jashtë formacionit ose në stol e pengon të gjejë ritmin e duhur fizik dhe sportiv.
Luis Enrique, nga ana tjetër, ka një filozofi të ndryshme. Spanjolli përdor rotacione të vazhdueshme me synimin që lojtarët kryesorë të mbërrijnë në pjesën vendimtare të sezonit në gjendjen më të mirë të mundshme.
Kjo strategji është aplikuar veçanërisht me Dembélén, duke marrë parasysh historinë e tij me dëmtimet gjatë periudhës te Barcelona.
Francezi ka munguar tashmë në dy nga shtatë ndeshjet e kampionatit dhe ka qenë titullar vetëm në tri prej tyre.
Sipas raportimit, batutat mes Dembélés dhe Luis Enriques për “pushimet e detyruara” kanë fshehur prej kohësh disa tensione dhe keqkuptime.
Dëmtimi ndaj Barcelonës, i pësuar gjatë një sprinti pas rreth 20 minutash lojë, vetëm sa e ka rikthyer debatin.
Dembélé pritet të mungojë rreth tre javë, por periudha mund të shkojë deri në një muaj për shkak të kalendarit të kombëtareve.
PSG ndërkohë duhet të përballojë edhe mungesën shumë më të gjatë të Kvaratskhelias, duke e bërë situatën në repartin ofensiv edhe më të komplikuar.
