Harry Kane ishte sërish protagonist për Bayern Munich në barazimin ndaj Arsenalit, ndërsa sulmuesi anglez regjistroi edhe një rekord të pazakontë në historinë e Champions League.
Në minutën e 21-të, Kane mori përsipër ekzekutimin e një goditjeje fundore vetëm pak metra larg Manuel Neuer. Një skenë e rrallë për një qendërsulmues, por që tregoi edhe një herë rolin gjithnjë e më të gjerë të anglezit në lojën e Bayernit.
Kane zbriti vazhdimisht në gjysmëfushën e tij për të ndërtuar aksionet dhe më pas dhuroi një pasim të shkëlqyer për Alphonso Davies, i cili realizoi golin e parë të bavarezëve.
Më vonë, anglezi fitoi edhe penalltinë që e ekzekutoi vetë për golin e dytë.
Sipas “Opta”, Kane u bë lojtari i parë në historinë e Champions League, që prej fillimit të regjistrimit të këtyre të dhënave në sezonin 2003/04, që në të njëjtën ndeshje shënon gol, jep asist dhe ekzekuton një goditje fundore.
Pas ndeshjes, Kane bëri shaka kur u pyet për pasimin e tij spektakolar.
“Për cilin po flisni, goditjen fundore apo asistin?”, u përgjigj ai.
Sulmuesi shpjegoi se kishte folur me Davies përpara ndeshjes dhe i kishte kërkuar të bënte vrapimet në hapësirë sa herë që ai merrte topin.
“Ndjej sikur i shoh situatat në fushë. I thashë Phonzy-t para ndeshjes: ‘Kur ta kem topin, bëj vrapimet dhe do të përpiqem të të gjej’.”
Paraqitja e Kane mori vlerësime të shumta edhe nga emra të njohur të futbollit. Thierry Henry u habit veçanërisht nga fakti që një qendërsulmues ekzekutoi goditjen fundore, ndërsa Steven Gerrard shkoi edhe më tej.
“Ai mund të jetë lojtari më i mirë që Anglia ka pasur ndonjëherë”, deklaroi Gerrard.
Edhe Declan Rice, autori i golit të barazimit për Arsenal, vlerësoi maksimalisht sulmuesin e Bayernit.
“Është koha e tij. Vazhdon të përmirësohet me kalimin e viteve dhe sot ishte i jashtëzakonshëm.”
