Dalëngadalë, hap pas hapi, Franco Mastantuono (18 vjeç) po rikthehet në formë pas dëmtimit në ijë që e la jashtë nëntorin e kaluar. Ai humbi katër ndeshje (dy në La Liga dhe dy në Champions League). U grumbullua edhe për disa takime të tjera deri në fund të vitit, por mbeti në stol. Shpresonte që Copa del Rey të ishte terren prove, por eliminimi i hershëm i Real Madridit ia preu këtë mundësi.
Me Álvaro Arbeloa në stol, Mastantuono është rikthyer në formacion (edhe pse ende nuk ka përfunduar një ndeshje të plotë nën drejtimin e tij) dhe ka nisur të japë sinjale pozitive. Sot ai ka një tjetër shans për të treguar veten, sidomos për shkak të mungesave të Vinicius, Bellingham dhe Rodrygo, që i hapin më shumë hapësirë dhe përgjegjësi. Dhe pikërisht në Valencia, qyteti ku shënoi golin e tij të parë në La Liga, në fitoren 3-0 të Realit ndaj Levantes shtatorin e kaluar.
Argjentinasi vjen pas paraqitjeve jo shumë bindëse (55 minuta kundër Benficës dhe 60 ndaj Rayo Vallecanos), por më herët kishte lënë shenjë ndaj Monacos, ku shënoi golin e parë në Champions, si edhe ndaj Villarrealit, ku u pa më aktiv dhe energjik në rikuperimin e topave. Ai njihet si lojtar që sakrifikon shumë fizikisht dhe e “ha” ndeshjen me vrapime dhe presion.
Arbeloa e vlerësoi hapur: “Franco ka potencial të jashtëzakonshëm. Mund të luajë në krah, të kalojë mbrojtësit, të futet brenda… Ka fuqi, driblim dhe mbi të gjitha një ritëm pune të madh, me intensitetin që sjell në lojë. Të vish te Real Madridi nuk është e lehtë sepse ky klub kërkon shumë, por sapo e sheh duke luajtur, kupton aftësitë e tij. Jam shumë i kënaqur me punën, angazhimin dhe atë që po jep në fushë. Jam i sigurt se do të përmirësohet.”
Klubi vlerëson pjekurinë e tij dhe vijon t’i besojë zhvillimit afatgjatë, si një investim për të ardhmen. Ky besim po ia rrit moralin një lojtari që erdhi në Madrid sapo mbushi 18 vjeç dhe u vu menjëherë në qendër të vëmendjes, sidomos për shkak të shifrës së lartë të transferimit (mbi 60 milionë euro). Edhe pse shpesh aktivizohet në krahun e djathtë (kur në natyrë është më shumë mesfushor ofensiv), deri tani ka bërë më shumë “punë të pistë” sesa të shkëlqejë.
Gjatë periudhës së rikuperimit nga pubalgjia, ai udhëtoi në Alicante, ku kombëtarja e Argjentinës ishte në grumbullim, për të folur me trajnerin Scaloni për të ardhmen e afërt. Botërori është në horizont dhe Mastantuono nuk dëshiron ta humbasë — por fillimisht, hap pas hapi, ai po rikthen ritmin dhe formën e tij
