Pas lajmit të ndarjes nga jeta të Papa Françeskut, një prej figurave më të dashura dhe të respektuara botërisht, ka ardhur edhe reagimi i Kryetarit të Komunitetit Mysliman të Shqipërisë, H. Bujar Spahiu.
Kreu i KMSH-së e cilësoi Papën si një lider shpirtëror që kontribuoi fuqishëm në ndërtimin e urave të dialogut ndërfetar dhe në promovimin e paqes ndërmjet komuniteteve fetare. Ai kujtoi me respekt të veçantë audiencën që pati me Atin e Shenjtë në maj të vitit 2022, një takim që e përshkroi si të ngrohtë dhe të paharrueshëm.
“Bota nuk ka humbur vetëm një Papë, por edhe një lider të madh që punoi pa reshtur për një botë më të qetë e të pa trazuar,” u shpreh Spahiu, duke shtuar se edhe Komuniteti Mysliman ka humbur një mik të veçantë.
Në fund të reagimit të tij, Kryetari i KMSH-së u shpreh ngushëllimet më të sinqerta bashkëpunëtorëve të Papa Françeskut në Shqipëri dhe shtetit të Vatikanit.
Reagimi i plotë i Kryetarit të KMSH-së, H. Bujar Spahiu:
Sot u nda nga jeta një Papë që e deshi shumë dialogun ndër fetar, e deshi shumë vendin tonë dhe vlerësoi veçanërisht Komunitetin Mysliman të Shqipërisë për rolin që luan në shoqërinë shqiptare.
Kam patur nderin e veçantë të jem kryetari i parë në historinë e KMSH që kam patur një audiencë të posaçme, me ftesë të tij, me Papa Françeskun. Takim që u zhvilluam më 6 maj 2022.
Në takimin kokë më kokë me Papa Françeskun, takim i cili zgjati për më shumë se 30 minuta, patëm një diskutim të gjerë nga i cili, përveç të tjerash, kuptova rëndësinë që ai i kushtonte dialogut dhe vlerësimit të lartë që kishte për Shqipërinë e për rolin e Komuniteti Mysliman.
Sot bota nuk ka humbur vetëm një Papë, por edhe një kryetar shteti e lider fetar që punoi shumë për paqe mes besimeve e për një botë më të qetë e të pa trazuar.
Unë dhe Komuniteti Mysliman kemi humbur gjithashtu një mik.
I shpreh ngushëllimet e mia bashkëpunëtorëve të tij të komunitetit katolik në Shqipëri dhe shtetit të Vatikanit!
