Toni Kroos ka vlerësuar maksimalisht punën e José Mourinhos pas fitores së Real Madridit ndaj Barcelonës në El Clásico, duke e cilësuar planin e portugezit si një nga çelësat kryesorë të suksesit në Camp Nou.
Ish-mesfushori i Real Madridit theksoi se skuadra ishte shumë mirë e pozicionuar dhe fitoi shumicën e dueleve falë intensitetit të lartë.
“Duhet ta vlerësoj punën e Mourinhos. Luajtën shumë mirë dhe ai kishte përgatitur një plan të shkëlqyer. Të luash me topin kundër kësaj Barcelone është shumë e rëndësishme, sepse ata vuajnë kur nuk e kanë topin”, deklaroi Kroos.
Gjermani veçoi edhe guximin e Real Madridit për mënyrën se si e përballoi ndeshjen në Camp Nou.
“Real Madrid dhe Mourinho ishin vërtet të guximshëm në Camp Nou dhe ky ishte një ndryshim i madh krahasuar me El Clásicot e fundit. Sulmuesit reaguan mirë dhe pati edhe momente ku skuadra u mbrojt në mënyrë shumë solide.”
Kroos foli gjithashtu për mungesën e Vinicius Junior dhe ndikimin e Kylian Mbappé, i cili realizoi dy gola.
“Vinicius nuk ka nevojë për një teknikë të jashtëzakonshme për të qenë i rrezikshëm. Do të doja ta shihja përballë Cancelos, sepse ai lë shumë hapësira pas. Mbappé dhe Vinicius janë një dhuratë për mesfushorët, sepse janë disa hapa më të shpejtë se mbrojtësit.”
Ish-lojtari i Real Madridit vlerësoi edhe lidhjen mes Arda Güler dhe Mbappé, duke nënvizuar se francezi është bërë një nga pikat kryesore të sulmit madrilen.
