Dani Carvajal ka dalë në mbrojtje të Vinicius Junior, i cili po kalon një periudhë të vështirë në aspektin e formës dhe është gjithashtu i pezulluar pas kartonit të kuq të marrë ndaj Villarrealit.
Ish-kapiteni i Real Madridit, tashmë lojtar i Getafes, foli në emisionin “El Larguero” për situatën e brazilianit dhe shprehu bindjen se ai do të rikthehet në nivelin e tij më të mirë.
“Në çdo karrierë ka momente më të vështira dhe ndoshta Vinicius po kalon një të tillë. Duhet të qëndrojë i qetë. Sapo ka rinovuar kontratën, është një futbollist fantastik dhe një person i jashtëzakonshëm. E di që Vinicius më i mirë do të rikthehet”, deklaroi Carvajal.
Mbrojtësi spanjoll theksoi gjithashtu karakterin e Vinicius, duke kujtuar se braziliani ka kaluar më parë situata edhe më të komplikuara.
“Ka kaluar momente më të vështira dhe ajo që admiroj shumë tek ai është se nuk fshihet kurrë. Kërkon topin, tenton golin dhe merr përgjegjësi. Nuk kam folur kurrë me të për një largim të mundshëm. Jam i sigurt që nuk i kanë munguar ofertat, por ai rinovoi”, shtoi Carvajal.
Vinicius u pezullua për katër ndeshje pas kartonit të kuq ndaj Villarrealit. Ai mungoi ndaj Sevillas dhe Barcelonës, ndërsa do të jetë jashtë edhe për sfidat kundër Racing Santander dhe Valencias.
Carvajal foli gjithashtu për përballjen e ardhshme mes Real Madridit dhe Getafes më 3 janar, duke bërë të qartë se do të mbrojë ngjyrat e klubit të tij aktual.
“Sigurisht që do të mbroj fanellën e klubit tim. Shpresoj që kur të përballemi në pjesën e dytë të sezonit, Getafe ta ketë siguruar mbijetesën dhe Real Madridi ta ketë fituar tashmë LaLiga-n”, tha ai.
I pyetur për pritjen që pret të marrë në “Santiago Bernabéu”, Carvajal u shpreh se një duartrokitje nga tifozët do të ishte mëse e mjaftueshme.
“Gjithmonë e kam ndier dashurinë e tifozëve, edhe tani. Një ovacion nga Bernabéu do të më mjaftonte.”
