Dhjetëra mijëra njerëz dolën të shtunën në rrugët e Madridit dhe qyteteve të tjera të Spanjës, duke kërkuar masa më të forta për përballimin e krizës së banesave. Protestuesit akuzojnë qeverinë se nuk po bën mjaftueshëm për të frenuar rritjen e qirave dhe për të garantuar aksesin në banesa të përballueshme.
Protestat u përshkallëzuan pasi opozita rrëzoi në parlament disa masa të propozuara nga qeveria për sektorin e strehimit. Paketat përfshinin masa për mbrojtjen e qiramarrësve në situata vulnerabël, kufizimin e disa formave të spekulimit me banesat dhe zgjatjen e kontratave të qirasë.
Kriza e strehimit është kthyer në një nga çështjet më të debatueshme në Spanjë, veçanërisht në Madrid dhe qytetet e mëdha turistike. Protestuesit kërkuan më shumë banesa sociale dhe ndërhyrje për uljen e kostove të qirasë, ndërsa qeveria përballet me presion në rritje për të ndërmarrë masa konkrete.
