E ardhmja e Kristjan Asllanit duket gjithnjë e më larg Interit. Klubi zikaltër, i fokusuar në balancimin e buxhetit dhe rinovimin e skuadrës, ka gjetur gjuhën e përbashkët me Bologna-n për transferimin e mesfushorit shqiptar.
Sipas raportimeve të medieve italiane, marrëveshja mes dy klubeve është arritur mbi bazën e 10 milionë eurove plus 40% të të ardhurave nga një shitje e mundshme e ardhshme. Një operacion që iu shërben të dyja palëve: Interi arkëton një shumë të rëndësishme dhe ruan të drejtën për të përfituar në të ardhmen, ndërsa Bologna siguron një mesfushor të ri, me eksperiencë në Serie A dhe potencial të madh për zhvillim.
Pengesa e vetme që ka mbetur është kontrata personale e lojtarit. Bologna ka ofruar 1,7 milionë euro neto në sezon, por Asllani kërkon 2 milionë, diferencë mbi të cilën palët po negociojnë. Kontaktet janë të vazhdueshme dhe nga ambientet pranë klubit kuqeblu mbizotëron optimizëm se marrëveshja do të mbyllet brenda fundit të muajit.
Ndërkohë, Interi, pasi të ketë mbyllur operacionet në dalje (përfshirë edhe shitjen e Nicola Zalewski-t te Atalanta për 17 milionë euro), do të përqendrohet tek afrimi i një mbrojtësi të ri qendror. Objektivi i klubit mbetet rinovimi i repartit defensiv, ku emra si Pavard, Acerbi, De Vrij dhe Darmian kanë të ardhme të pasigurt.
