Kristi Koçeku dhe Samet Qotaj janë dy efektivët e patrullës së përgjithshme në komisariatin e Shkodrës, të cilët mëngjesin e kësaj të shtune u bënë heronjtë e një 75-vjeçari me inicialet B. G.
Ky i fundit ndërmori një akt ekstrem pasi tentoi t’i japë fund jetës, duke u vetëhedhur nga një urë në lumen Buna. Rrjedha e ujit e mori me vete të moshuarin që po rrezikonte mbytjen.
Ishte një qytetar i rastësishëm që pa të moshuarin në ujë, dhe njoftoi menjëherë policinë.
Kristi dhe Sameti u gjendën pranë vendit të ngjarjes, dhe pa e menduar dy herë ndërmorën aktin heroic duke u future në ujin e ftohtë për të nxjerrë 75-vjeçarin. Pasi arritën ta shpëtonin, një ambulancë e mori burrin dhe e dërgoi në spital.
Teksa i falenderoi që e shpëtuan, i moshuari u tregoi efektivëve të policisë: Doja të mbytesha sepse kam disa problem personale.
Efektivët e policisë meritojnë të gjithë respektin e mundshëm dhe duhen duartrokitur për këto veprime humanitare dhe mesazhe të mira që shpërndajnë në publik, në një kohë kur situata psikologjike e njerëzve është e rëndë.
