Një operacion antidrogë i koduar “Deja” është finalizuar nga Policia e Dibrës, duke çuar në arrestimin e dy personave të dyshuar për kultivim të bimëve narkotike.
Sipas njoftimit të policisë, kontrollet intensive nga toka dhe monitorimi me dronë nga ajri kanë bërë të mundur zbulimin e një parcele të kultivuar me bimë të dyshuara narkotike Cannabis Sativa, në zonën e quajtur “Liqeni i Lukanit”, territor i bashkisë Dibër.
Gjatë ndërhyrjes, shërbimet e Policisë kanë kapur në flagrancë dhe kanë arrestuar shtetasit A. K., 38 vjeç, banues në Kamëz, dhe A. B., 39 vjeç, banues në fshatin Derjan, bashkia Mat.
Nga kontrolli në terren u konstatuan 1121 bimë të dyshuara narkotike Cannabis Sativa, të cilat u asgjësuan me anë të djegies.
Operacioni u zhvillua nga specialistët për Hetimin e Krimeve në Drejtorinë Vendore të Policisë Dibër, në bashkëpunim me shërbimet e Komisariatit të Policisë Dibër, Komisariatit të Policisë Mat dhe Komisariatit të Policisë Kamëz.
Policia e Dibrës vijon kontrollet në terren dhe u bën apel qytetarëve, veçanërisht banorëve të zonave rurale, të denoncojnë çdo rast apo informacion që lidhet me kultivimin e bimëve narkotike.
