Banka britanike HSBC njoftoi se ka testuar përdorimin e kompjuterëve kuantikë në tregun e obligacioneve korporative europiane, duke shënuar një avancim revolucionar në këtë fushë. Së bashku me një ekip nga IBM, HSBC arriti të regjistrojë një përmirësim prej 34% në parashikimin e mundësive të tregtimit të obligacioneve në çmim të caktuar.
Kjo teknologji, nëse do të adoptohet gjerësisht, mund të ndihmojë bankat dhe kompanitë e investimeve t’i çmojnë obligacionet dhe asetet e tjera me saktësi të lartë. Philip Intallura, kreu i Teknologjive Kuantike në HSBC, e cilësoi këtë arritje si një “shembull konkret sesi kompjuterët kuantikë mund të zgjidhin probleme reale të biznesit”.
Kompjuteri kuantik punon mbi mekanikat kuantike për të procesuar informacione dhe për të zgjidhur disa probleme që as superkompjuterët klasikë nuk mund t’i përballonin. Deri tani, kjo teknologji ka shërbyer kryesisht për hulumtime në laboratorë, ndërsa kjo është hera e parë që po përdoret për mbështetje në tregtimin financiar.
Në këtë test, procesori më i avancuar kuantik i IBM-së, Heron, ndihmoi sistemet ekzistuese të HSBC në identifikimin e modeleve të fshehta në të dhënat e tregut të obligacioneve, duke prodhuar rezultate më të mira se kompjuterët tradicionalë. Teknologjia tregoi se ishte në gjendje të vlerësonte shpejt kërkesat e klientëve, të përshtatej me kushtet e shpejta të tregtimit dhe të parashikonte nëse një transaksion obligacionesh do të kishte sukses në çmimin e caktuar, duke marrë në konsideratë të dhënat e tregut në kohë reale dhe vlerësimet e rrezikut.
HSBC e cilësoi provën si “premtuese” dhe shpreson që kompjuteri kuantik të optimizojë tregtimin e obligacioneve, duke përfshirë kërkesat për çmime në tregjet ndërmjet dy palëve pa një shkëmbim ose broker qendror. Banka është optimiste se aplikimi i teknologjisë kuantike është afër, duke theksuar se ndodhet në prag të një perandorie të re të kompjuterive në shërbimet financiare.
