Jürgen Klopp është rikthyer aty ku ndihet më mirë: në fushën e stërvitjes. Më shumë se dy vite pas përfundimit të aventurës së tij me Liverpoolin, trajneri gjerman drejtoi seancën e parë si përzgjedhës i Gjermanisë, përpara debutimit në Nations League ndaj Holandës së Xavi Hernández.
Pas një periudhe larg pankinës dhe eksperiencës si drejtues në strukturën e futbollit të Red Bull, Klopp u shfaq sërish me energjinë që e ka karakterizuar gjithmonë: shumë komunikues, i afërt me lojtarët dhe vazhdimisht aktiv gjatë stërvitjes.
Epoka e re ka sjellë edhe disa emra të rinj në kombëtare. Philipp Treu, Bambasé Conté, Yannik Engelhardt, Max Rosenfelder, Hennes Behrens dhe Younes Ebnoutalib janë mes lojtarëve që kanë marrë një mundësi nga trajneri i ri. Mesazhi i Klopp është i qartë: të përfaqësojnë Gjermaninë me krenari dhe të japin gjithçka në fushë.
Efekti i tij duket se është ndier menjëherë. Treu e përshkroi kështu: “Për të do të kalonim edhe nëpër zjarr. Është një njeri i jashtëzakonshëm.” Ndërsa Rosenfelder vlerësoi karizmën dhe mënyrën se si Klopp komunikon me lojtarët.
Ebnoutalib e përmblodhi edhe më qartë ndikimin e trajnerit: “Nëse Klopp të telefonon, duhet të shkosh. Është një nga trajnerët më të mirë në botë.”
Tani nis prova e vërtetë. Gjermania kërkon të hapë një kapitull të ri pas tre Botërorëve radhazi pa kaluar në fazat e avancuara, ndërsa sfida e parë e Klopp do të jetë pikërisht ndaj Holandës së Xavit.
