Kaká ka folur me shumë sinqeritet për periudhën e tij te Real Madrid, duke pranuar se aventura në “Santiago Bernabéu” nuk shkoi ashtu siç pritej.
Braziliani u transferua te Real Madrid në vitin 2009 nga Milan, në të njëjtën verë kur në Madrid mbërritën edhe Cristiano Ronaldo dhe Karim Benzema. Klubi pagoi rreth 67 milionë euro për të, por dëmtimet dhe konkurrenca e madhe bënë që Kaká të mos arrinte nivelin që kishte treguar më parë në Itali.
Në një intervistë me Rio Ferdinand, ish-fituesi i “Topit të Artë” u tregua shumë vetëkritik.
“Periudha ime te Real Madrid ishte shumë e plotë, si në aspektin personal ashtu edhe profesional. Erdha nga Milan si lojtari më i mirë, por nëse sot kërkon blerjet më të këqija në historinë e Real Madrid, unë jam në krye të listës bashkë me Hazard. Mund ta shihni: Kaká dhe Hazard”, u shpreh braziliani.
Kaká shpjegoi se problemet e tij në Madrid lidheshin kryesisht me dëmtimet dhe zgjedhjet e trajnerit José Mourinho.
“Problemet e mia në Madrid ishin, së pari dëmtimet, dhe së dyti vendimet e trajnerit. Mourinho preferonte lojtarë të tjerë: Özil, Di María, Benzema, Cristiano… Ne luftonim për dy vende në formacion dhe ai zgjodhi lojtarë të tjerë”, tha Kaká.
Braziliani pranoi se ajo periudhë e vuri në dyshim edhe identitetin e tij si futbollist.
“Pyesja veten: Kush jam unë? Më i miri në botë apo një nga blerjet më të këqija të Real Madrid? Në atë moment, besimi ishte shumë i rëndësishëm për mua. Nuk isha as më i miri në botë dhe as një nga më të këqijtë. Isha fëmijë i Zotit”, deklaroi ai.
Pavarësisht vështirësive, Kaká theksoi se nuk ka asnjë inat ndaj Real Madrid dhe se ruan mirënjohje të madhe për Florentino Pérez.
“Ditën që u largova, Florentino më thirri në zyrë dhe më tha: Nuk shkoi siç dëshironim të gjithë, por jam shumë i lumtur që luajte për ne. Ke qenë gjithmonë profesionist dhe me integritet. Nuk ke thënë kurrë asgjë të keqe për trajnerin, klubin apo askënd këtu”, tregoi Kaká.
Ai shtoi se nuk do të flasë kurrë keq për klubin apo për trajnerin, pasi ajo eksperiencë e ndihmoi të bëhej personi që është sot.
Në të njëjtën intervistë, Kaká foli edhe për Cristiano Ronaldon, duke e cilësuar si një shok të madh skuadre dhe një lojtar frymëzues.
“Ai kishte mënyrën e tij të të menduarit, të thyente rekorde dhe të shënonte më shumë gola. Ishte frymëzim. Kur ke lojtarë si ai në skuadër, është diçka e jashtëzakonshme”, tha braziliani.
Kaká përmendi gjithashtu Ronaldo Nazario si lojtarin më të mirë me të cilin ka luajtur, ndërsa për Lamine Yamal tha se i ngjan më shumë Neymarit në stilin e lojës.
