Te Real Madridi ka ende shpresë për Kylian Mbappé. Edhe pse fillimisht u duk se sulmuesi francez ishte praktikisht jashtë për ndeshjen e parë ndaj Manchester Cityt në Champions League, brenda klubit besohet se ekziston ende një mundësi që ai të jetë i gatshëm, të paktën si alternativë nga stoli. Mbappé, i dëmtuar me ndrydhje në gju, ndodhet në Paris ku po punon intensivisht me trajnerët e klubit për t’u rikuperuar sa më shpejt, pasi iu nënshtrua testeve të tjera për të konfirmuar diagnozën fillestare. Aktivizimi i tij në sfidën e parë mbetet i vështirë, por jo plotësisht i përjashtuar, sepse vetë lojtari e konsideron shumë të rëndësishme ndeshjen e 11 marsit në “Bernabéu” dhe dëshiron të jetë i disponueshëm qoftë edhe si zgjidhje emergjente.
Ndërkohë, Arbeloa duhet të përballet fillimisht me emergjencën e madhe për ndeshjen e kampionatit ndaj Celta Vigo në Balaídos, në një moment ku skuadra ka shumë mungesa dhe dyshime, sidomos në mbrojtje. Reali ishte në stërvitje në Valdebebas me shumë lojtarë jashtë: Huijsen, Mastantuono dhe Carreras mungojnë për shkak pezullimi, ndërsa Mbappé, Bellingham, Militao, Rodrygo dhe Ceballos janë jashtë për arsye fizike. Përveç tyre, edhe Alaba, Camavinga dhe Asensio mbeten në dyshim, duke e bërë situatën edhe më të ndërlikuar për trajnerin madrilen.
Problemi më i madh është reparti defensiv. Me Huijsen dhe Carreras të pezulluar, Militaon të dëmtuar dhe Alaban që vuan shqetësime muskulore, Arbeloa rrezikon të mbetet me shumë pak zgjidhje për qendrën e mbrojtjes. Në këtë moment, Rüdiger dhe Asensio duken si opsionet kryesore. Gjermani ka zhvilluar punë specifike parandaluese, por pritet të jetë gati pa probleme, ndërsa Asensio ka kryer pjesën më të madhe të stërvitjes me grupin dhe gjithçka lë të kuptohet se mund të jetë në dispozicion, pasi po rikuperohet nga goditja në qafë e pësuar ndaj Benficas.
Edhe Camavinga është në dyshim për sfidën me Celtan, pasi po vuan nga një infeksion dentar i dhimbshëm dhe është në pritje të uljes së ënjtjes për t’iu nënshtruar një ndërhyrjeje. Klubi shpreson që ai të mund të stërvitet të enjten, por për momentin nuk ka garanci. Sa i përket Rodrygos, ai po vazhdon fazën e rehabilitimit dhe përgatitjes së gjurit para operacionit, i cili ende nuk është planifikuar, pas këputjes së ligamentit kryq anterior dhe meniskut lateral në gjurin e djathtë.
Pra, në prag të ndeshjeve vendimtare të sezonit, Real Madridi mbetet i rrethuar nga pasiguri dhe mungesa, por lajmi që mban gjallë optimizmin është se Mbappé po punon kundër kohës dhe ende nuk është përjashtuar plotësisht për përballjen e parë ndaj Manchester Cityt.
