Ish deputeti i Partisë Demokratike, Ervin Salianji, i cili i është bashkuar protestës së opozitës para kryeministrisë, thotë se do të jetë gjithmonë me protestuesit, por shtoi se është e nevojshme revolta.
Salianji theksoi se skandalet e Belinda Ballukut dhe AKSHI-t treguan lidhjet e qeverisë me krimin e organizuar. Ai thotë se gjendur përballë këtij fakti, më shumë sesa protestat, janë të nevojshme revoltat, pasi qytetarët janë vjedhur.
“Kam qenë në çdo protestë opozitare. I jam bashkuar PD dhe opozitës, kam qenë denoncues i çdo afere korruptive të qeverisë. Nga lidhjet me krimin te aferat korruptive te denoncimet për keqqeverisjen. Sot është një ditë ku të gjithë qytetarët duhet të dalin për larguar qeverinë e Edi Ramës për shkak të korrupsionit dhe të rrënimit ekonomik dhe shkretimit të Shqipërisë. Ekspozimi që i ka bërë SPAK dhe dy dosjet e fundit, të zëvendës kryeministres dhe AKSHI, ku janë ekspozuar lidhjet e krimit me pushtetin dhe përdorimi i pushtetit politik për të fuqizuar dhe pasuruar njerëzit e lidhur me qeverinë tregon se kjo qeveri nuk ka legjitimitet moral për të qeverisur. Kjo është arsyeja. Qytetarët kërkojnë të njëjtën gjë pavarësisht se shumë prej tyre nuk dalin në shesh pavarësisht nga shqetësimet e tyre të përditshme besojnë demokratët që kanë dalë në shesh.”, tha Salianji.
I pyetur për takimet e tij me demokratët, që Berisha e ka cilësuar s axhendë personale, Salianji theksoi se janë në të mirë të PD-së.
“Axhenda ime është axhendë publike, në të mirë të shoqërisë dhe PD. Shoqëria kërkon PD që të jetë parti fituese. Padiskutim që ripërtërija e PD i shërben vetëm opozitarëve dhe shoqërisë. Do të jemi në komunikim për t’u përgjigjur të gjithë elementëve. Nëse personalisht ndërmarr një nismë për ta bërë PD fituese më nderon pavarësisht se janë mijëra demokratë në çdo sallë qytetesh ku kanë qenë plot, Kjo tregon diçka.”, tha ai.
Ai shtoi se do të jetë gjithmonë me protestuesit, kur u pyet nëse do të vazhdojë të qëndrojë në shesh nëse PD zgjat protestën.
“Sot dua të respektoj protestën, por duhet të jemi në revoltë. Kur vidhesh je në të drejtën e vetëmbrojtjes për të reaguar në çfarë do lloj force. Janë vjedhur miliona euro. Kemi parë se cfarë po ndodh edhe në rrugë, që janë kthyer si Qukës Qafë Plloça apo tuneli i Llogarasë, dhe elementë të tjerë që e bëjnë të domosdoshme revoltën. E rëndësishme është se qytetarët po protestojë dhe është në formë reagimi për të mos pranuar gjendjen e keqe që e ka zhytur Shqipërinë kjo qeverisje.“, tha ai.
