Uljan Shpatarakut, ish-zyrtarit të lartë të Policisë së Shtetit, i është hequr leja e armës, ndërsa gjatë kontrolleve në banesën e tij janë sekuestruar disa armë që i mbante me leje.
Shpataraku u arrestua pak ditë më parë, pasi u kap duke drejtuar automjetin me të cilin udhëtonte Ergys Agasi, i shpallur në kërkim nga drejtësia. Ish-zyrtari policor akuzohet për “Përkrahje të autorit të krimit”.
Ai u përjashtu nga Policia e Shtetit disa javë më parë dhe pas kësaj, ndaj tij nisën procedurat për heqjen e lejes së armës që zotëronte për shkak të funksionit.
Gjatë procedurave, autoritetet zbuluan se ish-zyrtari, i njohur si krahu i djathtë i ish-kryepolicit Ilir Proda, mbante në banesë edhe një arsenal armësh, të cilat rezultojnë se i kishte me leje.
Bëhet fjalë për 3 pistoleta, 2 armë tip shotgun dhe 2 pushkë, të cilat tashmë janë sekuestruar nga autoritetet.
