Senati i Shteteve të Bashkuara ka konfirmuar Todd Blanche në postin e Prokurorit të Përgjithshëm të SHBA-së, pas një votimi të ngushtë me 50 vota pro dhe 49 kundër.
Konfirmimi erdhi pas një procesi të debatueshëm, ku kandidatura e ish-avokatit personal të presidentit Donald Trump u përball me kundërshtime edhe brenda radhëve republikane.
Blanche, i cili më herët kishte drejtuar Departamentin e Drejtësisë si ushtrues detyre, tashmë merr mandatin e plotë për drejtimin e institucionit dhe zbatimin e agjendës së administratës Trump.
Kandidatura e Blanche u shoqërua me debate edhe për shkak të një marrëveshjeje që lidhej me padinë e Trump ndaj Administratës Tatimore të SHBA-së. Nën presionin e senatorëve, Blanche u zotua me shkrim se do të tërhiqej nga një fond i propozuar prej 1.8 miliardë dollarësh për aleatët e Trumpit, përfshirë persona të dënuar për pjesëmarrjen në sulmin ndaj Kapitolit më 6 janar 2021.
Todd Blanche ka shërbyer më herët si prokuror federal në Nju Jork, ndërsa u bë i njohur në nivel kombëtar si një prej avokatëve kryesorë të Trumpit gjatë çështjeve të tij penale.
Përkrahësit e tij, ndërkohë, argumentojnë se pikërisht përvoja dhe marrëdhënia e tij e afërt me presidentin mund ta bëjnë atë më efektiv në menaxhimin e kërkesave të Shtëpisë së Bardhë.
