Gianni Infantino është vendosur sërish në qendër të vëmendjes pas një hetimi që ngre pikëpyetje mbi pagesa të padeklaruara të marra nga presidenti i FIFA-s.
Sipas një investigimi të “The Times”, FIFA dyshohet se nuk ka bërë publike informacione për pagesa të rregullta shtesë që Infantino ka marrë përveç pagës së tij zyrtare.
Raportimi pretendon se bëhet fjalë për miliona euro të tjera, të cilat dyshohet se janë përdorur për të financuar stilin e jetesës së presidentit të FIFA-s në Miami, ku organizata ka ngritur një qendër të rëndësishme operacionale në prag të Kupës së Botës.
Gazetarët e “The Times” i kanë dërguar FIFA-s një kërkesë zyrtare për të sqaruar origjinën dhe ligjshmërinë e këtyre pagesave, por sipas raportimit ende nuk është dhënë një përgjigje e plotë.
Çështja ngre të tjera pikëpyetje mbi transparencën financiare në nivelet më të larta të FIFA-s, ndërsa organizata ka deklaruar vazhdimisht angazhimin e saj për standarde të forta transparence.
Infantino drejton FIFA-n që prej shkurtit të vitit 2016, kur pasoi Sepp Blatter. Sipas raporteve zyrtare të organizatës, paga e tij bazë vjetore është rreth 3.6 milionë euro, pa përfshirë bonuset.
