Trajneri i Barcelonës ka kërkuar që vëmendja të mbetet vetëm te sfida ndaj Galatasarayt, duke refuzuar të komentojë rreth Real Madridit dhe polemikave të fundit që lidhen me arbitrimin.
I pyetur nëse kritikat që vijnë nga Madridi lidhen me afrimin e El Clásicos, tekniku i katalanasve u përgjigj prerë.
“Shpresoj ta mësoni një ditë që unë nuk u përgjigjem kurrë pyetjeve për skuadrat e tjera. Jemi përpara një ndeshjeje me Galatasarayn. Ta respektojmë Galatasarayn.”
Ai u pyet edhe nëse do të preferonte që Vinicius të ishte në dispozicion për El Clásicon, por sërish shmangu komentet.
“Ma bëni përsëri këtë pyetje pas dy javësh…”
Sa i përket Champions League, trajneri i Barcelonës e cilësoi si “privilegj” faktin që rivalët e konsiderojnë skuadrën e tij ndër favoritet kryesore për trofeun.
“Është privilegj të jemi në këtë pozicion. Kemi punuar shumë, por rruga drejt finales është shumë e gjatë. Duhet të luajmë çdo ndeshje me të njëjtin mentalitet që kemi pasur që në fillim të sezonit.”
Për ndeshjen ndaj Galatasarayt, ai paralajmëroi veçanërisht për atmosferën që Barcelona do të gjejë në stadium.
“Duhet të jemi të përgatitur për atmosferën. Është një nga më të mirat në botë. Zhurma në stadium është e pabesueshme. Ata janë përmirësuar shumë ndaj skuadrave të mëdha dhe ne duhet të qëndrojmë të bashkuar.”
Trajneri foli gjithashtu me nota pozitive për Gabriel Jesus, duke e cilësuar si një nga surprizat e skuadrës.
“Është gati. Nëse do të luajë titullar, do ta vendosim pas stërvitjes. Jemi shumë të kënaqur me të. Duhet ta pranojmë se ka qenë pak surprizë. Sjellja e tij është fantastike dhe është një lojtar i madh.”
