Barcelona kërkon të vazhdojë ecurinë perfekte të sezonit, teksa të martën në mbrëmje përballet me Galatasarayn në Turqi për ndeshjen e dytë të Champions League.
Katalanasit e nisën kompeticionin me fitoren 5-1 ndaj Feyenoordit, ndërsa gjatë fundjavës mposhtën 3-0 Getafen. Megjithatë, Pau Cubarsí mendon se skuadra ka ende një aspekt ku duhet të përmirësohet.
Mbrojtësi spanjoll pranoi se Barcelona duhet të regjistrojë më shumë ndeshje pa pësuar gol.
“Është një sfidë dhe një nga gjërat më të rëndësishme. Të ndihmon të fitosh ndeshjet, sidomos në stadiume si ky. Duhet të përmirësohemi pak në këtë aspekt, por do ta bëjmë. Po tregojmë një përmirësim të jashtëzakonshëm.”
Cubarsí pritet të rikthehet titullar ndaj Galatasarayt dhe do të ketë përballë Victor Osimhen, të cilin e cilësoi si një nga sulmuesit më të mirë në botë.
“Jemi përballur edhe më parë me Osimhen. Është një nga sulmuesit më të mirë në botë dhe duhet të jemi shumë të përqendruar që nga fillimi.”
19-vjeçari shmangu komentet për ankesat e Real Madridit ndaj arbitrimit, duke u shprehur shkurt: “Nuk më intereson shumë ajo që vjen nga jashtë.”
Ai foli edhe për faktin se, pavarësisht moshës së re, tashmë konsiderohet titullar si te Barcelona ashtu edhe te kombëtarja.
“Jam vetëm në fillim dhe po përjetoj shumë gjëra të reja, por mosha nuk është justifikim. Duhet të bëj të njëjtën gjë si të gjithë të tjerët, të punoj fort dhe të jem konkurrues.”
Në fund, Cubarsí mbështeti hapur Lamine Yamal në garën për Topin e Artë.
“Të gjithë e dinë se është më i miri në botë. E meriton Topin e Artë, sigurisht.”
