Lideri i së djathtës shqiptare Sali Berisha, pritet të niset këtë të premte drejt Shteteve të Bashkuara të Amerikës, ku do të zhvillojë një vizitë disa ditore me një axhendë të ngjeshur aktivitetesh.
Vizita e kryetarit të Partisë Demokratike në SHBA pritet të zgjasë rreth shtatë ditë dhe do të përfshijë pjesëmarrjen në disa aktivitete, mes tyre edhe Konventën Kombëtare Republikane, e cila do të zhvillohet në Dallas më 9 dhe 10 shtator.
Përveç pjesëmarrjes në këtë aktivitet, Berisha pritet të zhvillojë edhe dy takime me komunitetin shqiptar në Shtetet e Bashkuara. Takimi i parë është parashikuar të mbahet në New York më 6 shtator, ndërsa takimi i dytë do të zhvillohet të martën, më 8 shtator në Teksas.
Ndërkohë, përveç axhendës së bërë publike, kryedemokrati pritet të zhvillojë edhe disa takime me kongresmenë dhe senatorë amerikanë. Për këto takime, megjithatë deri më tani nuk ka pasur një njoftim zyrtar.
Burime bëjnë me dije se delegacioni që do të shoqërojë kreun e PD-së gjatë vizitës në SHBA përbëhet nga nënkryetari i Partisë Demokratike, Belind Këlliçi, deputetët Albana Vokshi dhe Klevis Balliu, kreu i Partisë Republikane, Fatmir Mediu, si dhe sekretari Henri Ceno.
Rikthimi i Sali Berishës në Shtetet e Bashkuara vjen pas gati 14 vitesh. Hera e fundit që ai kishte udhëtuar përtej Atlantikut ishte në vitin 2012, në kohën kur mbante postin e kryeministrit të Shqipërisë.
Kujtojmë se më 12 qershor të këtij viti, me shpejtësi në mediat shqiptare qarkulloi lajmi se ndaj Sali Berishës ishte hequr statusi “non grata”.
Sipas informacioneve të bëra publike në atë kohë, kishte qenë e deleguara e Shteteve të Bashkuara të Amerikës në Shqipëri, Nancy VanHorn, ajo që kishte kontaktuar personalisht Berishën për ta njoftuar mbi vendimin e marrë nga Sekretari i Shtetit, Marco Rubio.
Mirëpo, kjo vizitë e Berishës vjen pas një lehtësimi që shteti amerikan i dha atij me qëllim që të marrë pjesë në këtë eveniment, dhe nuk ka lidhje me “non gratën” e vendosur ndaj tij.
Ish-kryeministri Sali Berisha u shpall “non grata” nga Departamenti Amerikan i Shtetit në maj të vitit 2021. Në argumentimin e saj, administrata amerikane e asaj kohe deklaroi se Berisha ishte përfshirë në korrupsion të nivelit të lartë, duke përmendur keqpërdorimin e fondeve publike dhe ndërhyrjen në procese publike për përfitime personale dhe politike.
Vendimi përfshinte gjithashtu familjen e tij dhe ndalonte hyrjen e tyre në territorin e Shteteve të Bashkuara.
Berisha e kundërshtoi menjëherë vendimin, duke e cilësuar atë si të motivuar politikisht dhe duke akuzuar kundërshtarët e tij në Tiranë për ndikim në këtë proces. Ai hodhi akuza edhe ndaj zyrtarëve të lartë amerikanë, duke pretenduar se vendimi ishte rezultat i lobimeve politike kundër tij.
Shpallja “non grata” solli pasoja të forta në jetën politike të Partisë Demokratike. Në shtator të vitit 2021, kryetari i atëhershëm i PD-së, Lulzim Basha, vendosi përjashtimin e Berishës nga grupi parlamentar demokrat. Ky vendim u pasua nga një përplasje e ashpër politike brenda partisë, e cila kulmoi me lëvizjen e Rithemelimit, mbajtjen e Kuvendit Kombëtar dhe rikthimin e Berishës në krye të Partisë Demokratike në vitin 2022.
Në vitin 2023, Berisha u vendos në masën e sigurisë “arrest shtëpie” në kuadër të hetimeve për dosjen “Partizani”, një vendim që ai e konsideroi politik. Pas më shumë se një viti, ai u lirua në fund të vitit 2024 dhe iu rikthye aktivitetit të plotë politik.
