Trajneri i Manchester City, Pep Guardiola, ka reaguar pas vendimit të Chelsea-t për të shkarkuar Liam Rosenior, pas humbjes ndaj Brighton. Spanjolli u shpreh i keqardhur për atë që ndodhi me trajnerin anglez, duke vlerësuar aftësitë e tij si trajner.
Pas ndeshjes së fundit të skuadrës së tij, Guardiola u pyet për situatën te Chelsea dhe nuk ngurroi të japë mendimin e tij. Ai theksoi se Rosenior ka nivelin e duhur për të drejtuar në nivele të larta dhe se vendime të tilla janë gjithmonë të vështira.
“Më vjen shumë keq. Jam i bindur që ai është një trajner në nivelin e kërkuar për atë nivel. Kur ndodhin gjëra të tilla, gjithmonë mendoj se sa me fat jam që jam në klubin ku jam”, u shpreh Guardiola.
Ndërkohë, shkarkimi i Rosenior pritet t’i kushtojë shumë Chelsea-t edhe financiarisht. Duke qenë se trajneri kishte firmosur një kontratë afatgjatë deri në vitin 2032, klubi londinez duhet të paguajë një dëmshpërblim rreth 24 milionë paund për ndërprerjen e parakohshme të marrëveshjes.
