Real Madridi është dorëzuar përballë situatës së Vinicius Junior, me klubin që tashmë pret një pezullim prej të paktën dy ndeshjesh për brazilianin pas kartonit të kuq ndaj Villarrealit.
Në Valdebebas nuk konsiderohet realiste mundësia e vetëm një ndeshjeje pezullim. Përkundrazi, ekziston frika se dënimi mund të shkojë edhe në tre ndeshje ose më shumë, për shkak të përmbajtjes së raportit të arbitrit.
Në raport përmendet “sjellje agresive” dhe fakti që Vinicius “duhej të mbahej nga shokët e skuadrës” gjatë protestave pas përjashtimit.
Braziliani u ndëshkua në minutën e 70-të, pasi tërhoqi nga flokët Nathan Saliban gjatë një aksioni që më pas përfundoi me golin e tij. VAR-i ndërhyri, arbitri rishikoi episodin dhe vendosi karton të kuq, ndërsa goli u anulua.
Sipas rregullores, kur përjashtimi vjen në një situatë ku lojtari nuk ka mundësi të luftojë për topin, dënimi minimal mund të jetë dy ndeshje. Pikërisht ky është skenari që Real Madridi pret në rastin e Vinicius.
Vetë lojtari e pranoi gabimin dhe kërkoi falje menjëherë pas ndeshjes.
“I kërkoj falje skuadrës dhe tifozëve”, shkroi ai në rrjetet sociale, ndërsa të njëjtën gjë e bëri edhe në dhomën e zhveshjes.
Megjithatë, ai vazhdon të ndihet i trajtuar në mënyrë të pabarabartë, duke rikthyer në rrjetet sociale episode të tjera të ngjashme ndaj tij që nuk kanë përfunduar me karton të kuq.
Nëse konfirmohet pezullimi me dy ndeshje, Vinicius do të mungojë ndaj Sevillas dhe, mbi të gjitha, në El Clásico ndaj Barcelonës më 25 tetor.
Ai do të mund të aktivizohet normalisht në Champions League ndaj Romës dhe RB Leipzig, pasi dënimi do të vlejë vetëm për kampionatin.
