Europa po përballet me një valë në rritje të sulmeve hibride nga Rusia, duke shtuar shqetësimet te personeli ushtarak, policia, politikanët dhe komuniteti shkencor.
Megjithatë, autoritetet gjermane të sigurisë theksojnë se vendi është i përgatitur dhe jo i pambrojtur ndaj këtyre kërcënimeve.
Zyra Federale e Policisë Kriminale ka rritur ndjeshëm kapacitetet e saj për të përballuar sulmet kibernetike.
Zyrtarët e policisë bëjnë të ditur se, edhe pse autorët e sulmeve operojnë përmes serverëve të shpërndarë në të gjithë botën, Gjermania ka mjetet dhe mekanizmat e nevojshëm për t’i neutralizuar ata.
Ministri i Brendshëm gjerman ka deklaruar se vendi do të përgjigjet fuqishëm ndaj çdo sulmi në hapësirën kibernetike, duke paralajmëruar masa të ashpra kundër autorëve.
Si pjesë e masave të reja të sigurisë, qeveria gjermane ka vendosur që, përveç Policisë Federale, edhe ushtria të ketë autoritet për të rrëzuar dronë në territorin gjerman.
Për më tepër, policia pritet të krijojë njësi të reja të specializuara në përdorimin e dronëve, me qëllim rritjen e mbrojtjes nga kërcënimet ajrore dhe kibernetike.
Një sfidë e madhe në trajtimin e sulmeve hibride është se Rusia operon shpesh në një “zonë gri”, duke e vështirësuar identifikimin e organizatorëve të vërtetë.
Shumë prej ekzekutuesve të sulmeve janë të rinj me precedentë penalë, shpesh të ardhur nga ish-republikat sovjetike, të cilët rekrutohen përmes platformave si Telegram.
Përballë këtij realiteti, Gjermania po përforcon të gjitha hallkat e sistemit të saj të sigurisë, duke theksuar rëndësinë e bashkëpunimit mes institucioneve. Investimet në mbrojtjen kibernetike dhe në kapacitetet ushtarake tregojnë një qasje më të vendosur ndaj kërcënimeve të reja globale.
