Për muaj të tërë, ndoshta edhe prej më shumë se një viti, nuk ishte parë ky version i Real Madrid, por në Mynih u rikthye sërish ajo skuadër që për dekada ka tmerruar Europën me instinktin e saj të mbijetesës. Në “Allianz Arena”, madrilenët e çuan Bayern në limit në një ndeshje heroike, të luajtur me sakrificë të jashtëzakonshme, por gjithçka ndryshoi pas përjashtimit të Camavinga me karton të kuq, në një vendim që u konsiderua i pabesueshëm dhe që ndikoi drejtpërdrejt në fatin e një përballjeje ku Real Madrid kishte kaluar tri herë në avantazh.
Skuadra e drejtuar nga Arbeloa do të mbetet me hidhërimin se nuk ka qenë gjatë gjithë sezonit në nivelin që tregoi në Mynih, ndërsa tani pritet të nisë një periudhë reflektimi të thellë dhe ndryshimesh të mëdha.
Real Madrid shkoi në sfidën më të rëndësishme të sezonit pa një mesfushor qendror natyral, hallka që lidh mbrojtjen me sulmin. Tchouameni mungoi për shkak të pezullimit, ndërsa Camavinga nuk konsiderohej zgjidhja ideale për atë rol, për shkak të impulsivitetit të tij në një pozicion ku çdo gabim kushton shumë. Kjo e detyroi Arbeloa të spostonte Valverde në qendër, përkrah tre mesfushorëve ofensivë si Bellingham, Brahim dhe Güler, të gjithë disi jashtë rolit të tyre natyral.
Ndeshja nisi në mënyrë të çmendur. Real Madrid barazoi shumë shpejt përballjen pas një gafe të Neuer, të cilën Arda Güler e shfrytëzoi me një goditje të saktë nga larg. Por Bayern reagoi menjëherë dhe riktheu baraspeshën pas një këndi, ku Lunin dhe mbrojtja madrilene dështuan të kontrollonin situatën.
Përballja u kthye në një duel të hapur, brutal dhe spektakolar. Bayern dominoi në posedim dhe ushtroi presion të vazhdueshëm, por Real Madrid ishte më i rrezikshëm në kundërsulm. Mbappe ishte në formë të shkëlqyer dhe shumë superior ndaj qendërmbrojtësve gjermanë, ndonëse Vinicius nuk e mbështeti siç duhej dhe humbi edhe një rast shumë të lehtë pranë portës.
Me kalimin e minutave, madrilenët treguan efikasitet të madh. Güler shënoi sërish nga një goditje dënimi, ndërsa më pas Mbappe përfitoi nga kaosi në mbrojtjen e Bayern dhe realizoi një tjetër gol. Në atë fazë, ndeshja ishte një reklamë e vërtetë për Champions League, me ritëm të lartë, kthesa të shumta dhe emocione të forta.
Megjithatë, gjithçka mori tjetër drejtim në momentin kur Camavinga u ndëshkua me kartonin e dytë të verdhë për vonesë në ekzekutimin e një goditjeje dënimi. Një vendim që u cilësua i pakuptueshëm për një ndeshje të këtij niveli dhe që ndryshoi rrjedhën e takimit.
Pas mbetjes me dhjetë lojtarë, Real Madrid humbi ekuilibrin dhe Bayern përfitoi. Luis Díaz dhe Olise shënuan golat që vulosën eliminimin e madrilenëve nga Champions League.
Në fund, ishte një dalje me dinjitet për Real Madrid, një eliminim që tregon karakterin e skuadrës në një natë të madhe europiane, por që nuk mjafton për të sjellë ngushëllim dhe as për të shmangur revolucionin që duket se po afrohet në “Santiago Bernabeu”.
