FIFA ka publikuar formacionin ideal të Kupës së Botës 2026, duke përzgjedhur 11 futbollistët që spikatën më shumë gjatë turneut të zhvilluar këtë verë në Amerikën e Veriut.
Formacioni dominohet nga kampionia e re e botës, Spanja, e cila përfaqësohet me tre futbollistë, po aq sa edhe Franca. Argjentina ka dy lojtarë në këtë njëmbëdhjetëshe, ndërsa Norvegjia, Anglia dhe Kepi i Gjelbër përfaqësohen me nga një emër.
Në portë është përzgjedhur Vozinha, i cili u bë një nga historitë më të bukura të këtij Botërori. Portieri i Kepit të Gjelbër fitoi admirimin e tifozëve me paraqitjet e tij mbresëlënëse, duke ndihmuar ekipin e tij të përballej denjësisht me Spanjën dhe Argjentinën, pa u mposhtur brenda 90 minutave në këto sfida.
Në repartin e mbrojtjes janë dy kampionët e botës me Spanjën, Marc Cucurella dhe Pedro Porro, ndërsa qendra e mbrojtjes përbëhet nga francezi Dayot Upamecano dhe argjentinasi Lisandro Martínez.
Nga ky formacion mungojnë Aymeric Laporte dhe Pau Cubarsí, me këtë të fundit që konsiderohej një nga shtyllat kryesore të mbrojtjes së Spanjës dhe një nga mbrojtësit më të mirë të turneut.
Mesfusha përbëhet nga tre yje të futbollit evropian: Jude Bellingham i Anglisë, Rodri i Spanjës dhe Michael Olise i Francës, të cilët lanë gjurmë me paraqitjet e tyre gjatë gjithë kompeticionit.
Në sulm janë përzgjedhur tre nga emrat më të mëdhenj të futbollit botëror. Kylian Mbappé udhëheq repartin ofensiv, pasi e mbylli turneun si golashënuesi më i mirë me 10 gola, duke vendosur gjithashtu rekordin historik si golashënuesi më i mirë në historinë e Kupës së Botës me 22 gola.
Krah tij në formacion janë Lionel Messi dhe Erling Haaland. Kapiteni argjentinas realizoi tetë gola gjatë këtij Botërori, ndërsa sulmuesi norvegjez e përfundoi turneun me shtatë gola.
