Izni Draxhoshi, vëllai i Han Draxhoshit që humbi jetën mbrëmjen e sotme në spitalin e Traumës pasi kishte rënë në kontakt me rrymën elektrike, ka dhënë një intervistë ekskluzive për IliriaNews.al.
Ai tregoi se si e mori vesh ngjarjen e rëndë pasdite, ku kolegë të vëllait e kishin njoftuar se Hani kishte pësuar diegie të rënda dhe është nisur me urgjencë në spital. Izniu tregon se vëllai la pas gruan e ve, e cila ka nevojë për mbështetje, prandaj ai i bën thirrje kompanisë ku punonte vëllai që t’i ofrojë përkrahje.
I prekur ai kërkon që ngjarja të zbardhet dhe drejtësia të shkojë në vend.
Kujtojmë se pak më parë policia njoftoi se 56-vjeçari Han Draxhoshi humbi jetën në spital pasi kishte rënë në kontakt me rrymën elektrike. Sipas informacioneve që IliriaNews.al ka mësuar, Hani kishte punuar 17 vite si punonjës policie dhe gjatë dy viteve të fundit punonte officer sigurie i kompanisë “ILLYRIAN GUARD’ dhe punonte tek Albcontrol në Rinas.
Shiko videon e plotë këtu!
Njoftimi i Policisë:
Tiranë/Informacion paraprak
Më datë 09.11.2024, është paraqitur në spital për ndihmë mjekësore shtetasi H. D., 56 vjeç, punonjës i Shërbimit Privat të Sigurisë Fizike, i cili dyshohet se gjatë orarit të punës, ka rënë në kontakt me rrymën elektrike në një kabinë elektrike (disa metra larg vendit ku kryente shërbimin). Si pasojë e dëmtimeve të marra ky shtetas ka ndërruar jetë në spital.
Grupi hetimor po punon për sqarimin e rrethanave të ngjarjes.
