Santiago Gimenez është sulmuesi më i ri i Milan-it. Meksikani u transferua nga Feyenoord për 30 milionë euro plus bonuse. Gimenez ishte i pranishëm në tribuna për të ndjekur derbin ndaj Inter-it, nën shoqërinë e Zlatan Ibrahimovic.
Në një intervistë për DAZN Italy, Ibra foli për derbin dhe sigurisht nuk mund të rrinte pa komentuar blerjen e Gimenez.
“Ne e kemi ndjekur dhe e kemi dashur që në korrik, por atëherë nuk ishte e mundur. Tani, u krijua mundësia dhe ne bëmë një investim të rëndësishëm”, tha suedezi.
Gjatë intervistës, Diletta Leotta e pyeti Ibrahimovic-in për një krahasim të Gimenez me sulmuesin legjendar Christian Vieri, i cili ishte i ftuar në studio.
“A është Santi Gimenez po aq i fortë sa Vieri apo më i fortë?”, ishte pyetja e moderatores dhe sigurisht që Ibrahimovic nuk mund të rrinte pa dhënë një përgjigje pikante.
“A është Gimenez aq i fortë sa Vieri? Jo, ai është si Ibra. Ai është në një nivel tjetër”, u përgjigj Ibrahimovic.
