Kreu i Inspektoratit Kombëtar për Mbrojtjen e Territorit, Afrim Qendro ka bërë të ditur se kanali i burimit ujor dhe ujitjes në fshatin Mirakë të Bashkisë Librazhd është rikthyer në funksion të plotë, pas ndërhyrjes së IKMT-së në përgjigje të ankesave të banorëve të zonës.
Banorë të Mirakës, Xibrakës dhe Polisit kishin denoncuar dëmtimin e kanalit dhe bllokimin e rrjedhës së ujit si pasojë e ndërhyrjeve të kryera pa leje. Pas marrjes së ankesës, inspektorët e IKMT-së kryen verifikimet në terren, ku konstatuan punime të paligjshme në infrastrukturën ujitëse.
Nga verifikimi rezultoi se shtetasi me inicialet M.H. kishte vendosur tuba plastikë në kanal, ndërsa kishte kryer edhe punime me beton, duke ngushtuar hapësirën e kalimit të ujit dhe duke reduktuar rrjedhën e tij. Sipas IKMT-së, këto ndërhyrje ishin kryer pa u pajisur me lejet përkatëse nga institucionet përgjegjëse.
Pas konstatimit të shkeljes, IKMT ndoqi procedurat administrative dhe ndërhyri në terren për të rikthyer kanalin në gjendjen e mëparshme. Me përfundimin e punimeve, rrjedha e ujit është normalizuar dhe kanali është vënë sërish në shërbim të banorëve të Mirakës, Xibrakës dhe Polisit për vaditjen e tokave të tyre.
“Inspektorët e IKMT-së verifikuan situatën në terren dhe konstatuan se shtetasi M.H. kishte vendosur tuba plastikë në kanal ndërsa kishte hedhur edhe beton duke reduktuar lëvizjen e ujit në diametrin e tubit. I gjithë punimi ishte kryer pa u pajisur me leje nga institucionet shtetërore.
Pas konstatimit të rastit, IKMT kreu të gjitha procedurat administrative dhe ndërhyri për të rikthyer kanalin në gjendjen e mëparshme, në shërbim të banorëve të këtyre tre fshatrave”, thuhet në njoftimin e bërë nga Qendro.
