Ditën e hënë vendi ynë do të jetë në ndikim të masave ajrore të paqëndrueshme.
Moti parashikohet me vranësira dhe pas orëve të pasdites me kthjellime dhe vranësira të pakta në zonat malore.
Reshjet e shiut do të nisin që në orët e para të ditës, fillimisht në veriperëndim dhe më pas do të shtrihen në veri dhe lokalisht në zonat qendrore. Në veriperëndim parashikohen reshje me intensitet mesatar deri të lartë, të shoqëruara me shtrëngata, stuhi, shkarkesa elektrike dhe, në disa zona, edhe me breshër.
Gjatë mesditës, reshjet pritet të përfshijnë pjesën më të madhe të vendit me intensitet të ulët. Në veriperëndim dhe pjesërisht në qendër, priten reshje me intensitet mesatar, herë pas here në formën e shtrëngatave. Pasdite, reshjet do të mbeten kryesisht përgjatë zonave malore, ndërsa në mbrëmje pritet ndërprerja e tyre në të gjithë territorin.
Era do të fryjë nga kuadrati i jugut me shpejtësi mesatare rreth 8 m/s, por në bregdet, zonat luginore dhe gjatë zhvillimit të vranësirave mund të arrijë deri në 20 m/s.
Në det parashikohet valëzim me forcë 2 deri në 4 ballë.
