Ligjvënësit e Groenlandës votuan të martën në favor të një marrëveshjeje mes ishullit, Danimarkës dhe Shteteve të Bashkuara, që synon forcimin e sigurisë në rajonin e Arktikut dhe në Atlantikun e Veriut. Votimi vjen pas disa muajsh tensionesh, të nxitura nga deklaratat e presidentit amerikan Donald Trump për marrjen nën kontroll të Groenlandës, territor autonom që është pjesë e Mbretërisë së Danimarkës.
Marrëveshja synon të rrisë bashkëpunimin mes tre palëve për çështjet e sigurisë në një rajon me rëndësi strategjike, ku prania ushtarake dhe interesat gjeopolitike janë shtuar. Groenlanda ndodhet në një pozicion kyç mes Amerikës së Veriut dhe Evropës, ndërsa Arktiku po fiton rëndësi për shkak të konkurrencës mes fuqive të mëdha dhe ndryshimeve klimatike që po hapin rrugë të reja detare.
Miratimi i marrëveshjes vjen në një moment delikat për marrëdhëniet mes Uashingtonit dhe Kopenhagës. Trump ka përsëritur se SHBA-ja ka nevojë për Groenlandën për arsye sigurie, ndërsa autoritetet daneze dhe groenlandeze kanë kundërshtuar idenë e marrjes së territorit. Groenlanda gëzon vetëqeverisje të gjerë, por Danimarka vijon të jetë përgjegjëse për mbrojtjen dhe politikën e jashtme të saj.
