Presidenti amerikan, Donald Trump ka mbajtur një konferencë për shtyp së bashku me sekretarin e Përgjithshëm të NATO-s Mark Rutte, në samitin e NATO-s në Hagë, ku po marrin pjesë 32 liderë të vendeve anëtare të aleancës.
Gjatë fjalës së tij, Trump theksoi rëndësinë e rritjes së buxhetit të mbrojtjes në 5%, një kërkesë që ai vetë ka parashtruar dhe që është pranuar si prioritet nga aleatët.
Sekretari i Përgjithshëm i NATO-s, Mark Rutte u shpreh i bindur se vendet anëtare do të votojnë për këtë rritje, duke vlerësuar rolin kyç të Trump në arritjen e këtij konsensusi.
“Kjo nuk do të kishte ndodhur pa zgjedhjen dhe rizgjedhjen e tij në Shtëpinë e Bardhë,” – tha Rutte gjatë konferencës për media.
Në fjalën e tij, Trump komentoi gjithashtu situatën e armëpushimit midis Izraelit dhe Iranit, duke e cilësuar atë si një sukses të rëndësishëm dhe një fitore të madhe për SHBA-në dhe aleatët e saj.
Ai nënvizoi se Irani nuk do të mund të zhvillojë një armë bërthamore dhe falenderoi goditjet që i janë bërë objekteve bërthamore iraniane, të cilat sipas tij janë shkatërruar plotësisht.
Trump përmendi gjithashtu nenin 5 të NATO-s, duke garantuar se SHBA-ja do të qëndrojë pranë aleatëve dhe se aleanca do të jetë e fortë në ballafaqimin me sfidat aktuale, duke përfshirë mbështetjen e vazhdueshme për Ukrainën në luftën kundër agresionit rus.
