Takimi i presidentit rus, Vladimir Putinit me të dërguarin special të SHBA-së, Steve Witkoff, në Shën Petersburg ka përfunduar, me luftën në Ukrainë si temën kryesore të diskutimit.
Ata kanë pasur biseda që zgjatën disa orë në Shën Petersburg. Putin dhe Witkoff diskutuan shumë tema, duke përfshirë bisedimet me Volodymyr Zelensky, një takim të mundshëm trepalësh midis Rusisë, SHBA-së dhe Ukrainës, si dhe lirimin e të burgosurit amerikan Steven Hubbard.
Nga ana e tij, Presidenti ukrainas Volodymyr Zelensky tha më parë se shpreson për një rezultat pozitiv nga takimet e të dërguarit të SHBA-së Steve Witkoff në Rusi dhe se mbështet bisedimet midis udhëheqësve të Kievit, Uashingtonit dhe Moskës.
Zelensky tha në një intervistë me Fox News se bisedimet e tij me Witkoff në Oslo një ditë më parë ishin produktive dhe se Ukraina është gati për diplomaci. Ai falënderoi Shtetet e Bashkuara për rivendosjen e rrjedhës së informacionit dhe tha se shpresonte që kufizimet në shërbimet satelitore Starlink dhe Starshield do të hiqen së shpejti.
“Shpresoj që… brenda – nuk e di, disa orësh – do të kemi ndonjë rezultat pozitiv, me vullnetin e Zotit”, tha ai.
Zelensky tha se ishte e rëndësishme të “ngriheshin” konfliktet dhe se kishte një zhvendosje drejt diplomacisë dhe një marrëveshjeje që do të përfshinte garanci sigurie, duke mirëpritur thirrjen e Trump për armëpushim.
“Është e rëndësishme të negociohet në mënyrë trepalëshe”, tha Zelensky për Fox News, duke shtuar se do të ishte më mirë të përfshiheshin vendet evropiane.
