Kryebashkiakja socialiste e Dimalit, Juliana Memaj, ka kundërshtuar propozimin për shkrirjen e Bashkisë Dimal dhe bashkimin e saj me Bashkinë Berat dhe atë të Poliçanit, në kuadër të reformës së re administrativo-territoriale.
Në një reagim të gjatë, Memaj argumenton se Dimali ka identitet historik, ekonomi lokale dhe kapacitete financiare për të vijuar funksionimin si njësi vendore më vete.
Sipas saj, zona ka një histori që shkon që nga antikiteti dhe një potencial të rëndësishëm ekonomik, veçanërisht në bujqësi dhe tregti.
“Dimali duhet të vijojë të jetë njësi vendore më vete”, shkruan Memaj, duke theksuar se komuniteti i zonës ka shprehur vullnetin për të qëndruar i bashkuar si një njësi administrative, për shkak të lidhjeve historike, traditave dhe potencialit ekonomik.
Kryebashkiakja ngre pikëpyetje mbi kriteret e përdorura për riorganizimin territorial, duke deklaruar se analiza e ekspertëve nuk u është vënë në dispozicion institucioneve vendore për të dhënë sugjerime apo kundërshtime.
Ajo argumenton se Bashkia Dimal ka tregues financiarë që, sipas saj, e justifikojnë vijimin e funksionimit të saj. Memaj përmend nivelin e investimeve nga buxheti vendor, të ardhurat e gjeneruara dhe peshën e sektorit bujqësor në ekonominë e zonës.
“Si do të jetë më mirë Bashkia Dimal me Beratin, kur Bashkia Dimal rezulton të ketë një raport më të lartë të investimeve të kryera nga buxheti i vet krahasuar me Bashkinë Berat?”, shprehet ajo në reagimin e saj.
Sipas Memajt, një ndryshim i tillë duhet të bazohet në kritere të qarta, në një proces transparent dhe me përfshirjen e qytetarëve.
“Një organizëm administrativ është një qenie e gjallë. Çdo ndryshim duhet të jetë i mirë menduar, i argumentuar dhe të dalë nga një proces gjithëpërfshirës”, deklaron kryebashkiakja e Dimalit.
Ajo kundërshton shkrirjen e çdo bashkie që, sipas saj, funksionon dhe ka ekonomi lokale, duke kërkuar që vendimi për Dimalin të rishikohet.
Kundër ndryshimeve të propozuara territoriale kanë dalë edhe disa bashki të tjera. Kreu i Bashkisë Selenicë ka kundërshtuar bashkimin me Vlorën, ndërsa Patosi ka shprehur rezerva për bashkimin me Fierin. Edhe kryebashkiaku i Fushë-Arrëzit ka kundërshtuar propozimin, duke paralajmëruar kundërshtime publike ndaj reformës.
