Shkrimati italian anti-mafia Roberto Saviano qau në gjykatë të hënën, ndërsa gjyqtarët mbështetën një dënim kundër një bosi famëkeq të mafias, i cili u zbulua se e kishte kërcënuar atë.
Francesco Bidognetti, një ish-udhëheqës i mafias napolitane Camorra, i cili tashmë po vuante burgim të përjetshëm për një sërë krimesh të tjera të rënda, u dënua me 18 muaj burg për kërcënim.
Gjykata e apelit e Romës konfirmoi një vendim të vitit 2021 nga një gjykatë më e ulët, ndërsa mbështeti gjithashtu një dënim me 14 muaj burg për ish-avokatin e Bidognetti-t, Michele Santonastaso, për të njëjtin krim.
Pas vendimit, Saviano, 45 vjeç, qau me lot ndërsa përqafoi avokatin e tij. Ai u tha gazetarëve se gangsterët e Camorra-s i kishin “vjedhur jetën”, duke e detyruar të jetonte nën mbrojtje 24-orëshe.
Dënimet lidhen me një mesazh që Santonastaso lexoi në gjykatë në vitin 2008, gjatë një gjyqi tjetër, në emër të Bidognetti-t dhe një shefi tjetër të Camorra-s.
Mesazhi përmbante një “ftesë” për Savianon dhe një gazetar tjetër që “të bënin punën e tyre siç duhet”, e interpretuar si një aludim jo aq delikat për të ndaluar së shkruari për mafian napolitane.
Saviano ka jetuar nën shoqërimin e policisë që nga viti 2006, kur botoi “Gomorrah”, një ekspoze mbi Kamorrën që është bërë edhe film dhe serial televiziv.
