Deco ka bërë bilancin e merkatos së verës së Barcelonës, duke folur hapur për disa prej operacioneve më të rëndësishme të klubit. Drejtori sportiv blaugrana u ndal veçanërisht te transferimi i Rodrit dhe te tentativa e dështuar për Julián Álvarez.
Për argjentinasin, Deco këmbënguli se Barcelona veproi në mënyrë korrekte dhe se nuk i kërkoi kurrë lojtarit të ushtronte presion ndaj Atlético Madridit. “Ne bëmë gjërat siç duhet. Bëmë një ofertë dhe nuk morëm përgjigje. Ata nuk donin ta shisnin lojtarin, kaq. Nuk i kemi thënë kurrë Juliánit të deklaronte se donte të largohej nga Atlético”, tha ai.
Deco sqaroi gjithashtu se oferta e Barcelonës parashikonte pagesën në tre sezone dhe jo në gjashtë, siç është pretenduar nga Atlético. Marrëdhëniet mes dy klubeve janë tensionuar pas kësaj çështjeje, por drejtori sportiv i Barça-s insistoi se klubi katalanas nuk ka bërë asgjë të gabuar.
Ndryshe përfundoi operacioni për Rodrin. Barcelona fillimisht nuk besonte se mesfushori mund të largohej nga Manchester City, por sapo mësoi se ekzistonte kjo mundësi, Deco kontaktoi menjëherë drejtuesit e klubit anglez dhe në fund spanjolli zgjodhi Barça-n përpara Real Madridit.
Ai foli edhe për Bernardo Silvën, duke konfirmuar se portugezi kishte treguar interes për Barcelonën, por profili i tij nuk përputhej plotësisht me atë që kërkonte klubi. “Nuk ishte pozicioni që po kërkonim. E adhuroj si lojtar, por kishte edhe faktorë të tjerë, jo vetëm financiarë, por edhe minutat që mund t’i ofronim.”
Deco vlerësoi gjithashtu mënyrën diskrete me të cilën Barcelona realizoi transferimet e Anthony Gordon, Adeyemit dhe Gabriel Jesus, duke theksuar se rrjedhjet e informacionit vetëm sa i komplikojnë negociatat.
Në fund, drejtori sportiv foli edhe për sulmin dhe Topin e Artë. Ai deklaroi se Barcelona nuk e ndjen mungesën e një “numri 9” klasik, duke vlerësuar rolin e Raphinhas dhe Gabriel Jesus. Ndërsa për mungesën e Raphinhas dhe Pedrit nga lista e Topit të Artë ishte i prerë: “Është një skandal global”. Për Lamine Yamal, Deco nuk ka dyshime: “Është kandidati kryesor. Ka fituar me Barcelonën, është kampion bote dhe ishte më i miri në La Liga.”
