Luis de la Fuente ka dalë në mbrojtje të Lamine Yamal, vetëm pak javë para debutimit të Spanjës në Kupën e Botës ndaj Kepit të Gjelbër, më 15 qershor.
Trajneri i Spanjës deklaroi se sulmuesi i Barcelonës është shumë i motivuar dhe se duhet ta shfrytëzojë këtë moment, pasi askush nuk e di se në çfarë gjendjeje do të jetë në Botërorin e ardhshëm.
“Është shumë i emocionuar dhe ka shumë dëshirë. Është ende shumë i ri, por ka pjekuri të madhe. Ai e di që ky është momenti i tij dhe në jetë duhet t’i shfrytëzosh mundësitë”, u shpreh De la Fuente.
Lamine Yamal po rikuperohet nga një dëmtim muskulor që e ka mbajtur jashtë në pjesën e fundit të sezonit, por trajneri spanjoll është optimist se ai do të jetë gati në fillim të turneut. Megjithatë, aktivizimi i tij në ndeshjen e parë do të vlerësohet me kujdes.
De la Fuente foli edhe për listën finale prej 26 lojtarësh, duke pranuar se lënia jashtë e emrave si Álvaro Morata, Dani Carvajal dhe Álex Remiro nuk ishte e lehtë, por vendimet janë marrë vetëm mbi baza sportive.
Një nga temat më të diskutuara është mungesa e lojtarëve të Real Madrid. Për herë të parë në histori, Spanja do të shkojë në Kupën e Botës pa asnjë përfaqësues nga klubi madrilen, pasi jashtë mbetën edhe Carvajal, Dean Huijsen, Gonzalo García dhe Fran García.
“Për mua, skuadra më e madhe është kombëtarja e Spanjës. Nuk shoh nga vijnë lojtarët. E rëndësishme është të kemi futbollistë spanjollë krenarë për të përfaqësuar vendin e tyre”, tha De la Fuente.
Trajneri konfirmoi gjithashtu se e ka të qartë se kush do të jetë portieri titullar në ndeshjen e parë, edhe pse në listë janë Unai Simón, David Raya dhe Joan García. Sipas tij, Spanja ka shumë cilësi në këtë pozicion dhe vendimi është marrë pas një analize të gjatë.
Spanja shkon në Botëror si kampione e Evropës dhe De la Fuente pranon se skuadra e tij është mes favoriteve, por thekson se kjo nuk garanton asgjë në një turne ku disa kombëtare mund të luftojnë për trofeun.
