Portieri belg i Real Madrid CF, Thibaut Courtois, deklaroi në konferencën për shtyp para ndeshjes se i beson plotësisht bashkëlojtarit të tij Vinícius Júnior, i cili këmbëngul se është ofenduar në mënyrë raciste nga mesfushori argjentinas i SL Benfica, Gianluca Prestianni.
“E besoj 100% fjalën e Vinit. Vinícius nuk ka akuzuar kurrë në jetën e tij një kundërshtar për racizëm. Ai e ka dëgjuar qartë dhe na e ka thënë shumë herë”, u shpreh Courtois, duke e cilësuar situatën si një moment vendimtar për UEFA dhe për futbollin në luftën kundër racizmit.
Sipas belgut, UEFA duhet ta mbyllë përfundimisht këtë çështje dhe të japë një mesazh të fortë se racizmi nuk tolerohet: “Duhet t’u japim fund këtyre gjërave. Kjo ndodh vazhdimisht dhe duhet ndalur. Vendimi përfundimtar i takon UEFA-s”, shtoi ai.
Megjithatë, deri tani nuk ka prova përfundimtare që e vërtetojnë fajësinë e Prestiannit, ndaj UEFA po vijon hetimin për të marrë një vendim të drejtë.
