Një nga rrugët e shumta që u shemb ishte edhe Unaza e Burrelit, një investim për të lehtësuar kalimin e mjeteve, kryesisht të rënda, për të evituar qendrën e qytetit. Natyrisht, ndërtimi i një rruge gjithmonë është pozitiv, pasi sjell lehtësi për përdoruesit dhe kursim energjie, kohe e paraje.
Por, në këtë vendin tonë të vogël, ndërtimi i rrugëve gjithmonë është shoqëruar me abuzime të shumta, me tendera të paracaktuar, preferenca për firmat fituese apo edhe shembje masive, që nga veriu në jug, nga lindja në perëndim, aq sa ka izoluar edhe krahina të tëra.
Por, skandalet me këto rrugët që shemben qëndron te vendimmarrja e institucioneve përgjegjëse, të cilat në vend që të detyrojnë firmat që i bëjnë këto rrugë shkel e shko, shpenzojnë të tjera para’ për t’i riparuar, megjithëse janë brenda garancisë.
Sipas dokumenteve që ka hulumtuar Vox News, ditët e fundit kreu i ARRSH-së, Ami Kozeli, ka firmosur një tjetër tender të dyshimtë, atë të rifinancimin e Unazës së Burrelit. Ende pa dalë shkaktarët e shembjes, nëse faji ishte i projektuesit apo ndërtuesit, ky Autoritet bën tender dhe me paratë e shqiptarëve të varfër që po vidhen dita – ditës do të riparojë gabimet e firmave private.
Objekti i tenderit është “Masa inxhinierike Unaza Burrel”, ndërkohë që fondi limit është 90,833,340 lekë. Nëse do të konvertojmë në euro, me kursin e sotëm, shuma shkon në plot 955 mijë euro. Një vlerë tepër e lartë, aq më tepër jo nga xhepat e shkaktarëve, por nga xhepat e taksapaguesve, duke qenë se kostoja totale e ndërtimit të asaj rruge ishte vetëm 1.3 milionë euro.
Nëse e kanë bërë gabim, qoftë projektimin apo ndërtimin, përse nuk ndëshkohen? Madje të referohen te organet ligjzbatuese, pasi në këtë rast kemi një dëm të konsiderueshëm në buxhet të shtetit. Por, prapaskenat e tenderit të parë apo këtij të dyti që është gati, tregojnë shumëçka, pasi koha e ka treguar se firmat ndërtuese që nuk e bënë mirë rrugën shkojnë dhe fitojnë edhe këto tenderat e rinj, siç ishte rasti i shembjes në Librazht.
Prej shumë muajsh, Unaza e poshtme e qytetit të Burrelit është jashtë funksionit, pasi ka pësuar 4 shembje, ku dy prej tyre kanë dëmtuar gjithë trupin e karrexhatës. Më problematike paraqitet në anën perëndimore të saj, ku të paktën në dy vende e gjithë traseja është dëmtuar rëndë duke bërë që në të të mos kalojë asnjë lloj automjeti.
Pjesa më e madhe e banorëve e kanë të pamundur të shkojnë me automjete tek shtëpitë e tyre, ndërsa shembja e rrugës vazhdon, ka vënë në rrezik edhe banesat. Rikonstruksioni total i Unazës së Poshtme të qytetit të Burrelit është financim i Autoritetit Rrugor Shqiptar, me vlerë 128 milion lekë të reja, i nisur dy vite më parë. Projekti po zbatohej nga kompania “ULZA” sh.p.k, me pronar ndërtuesin Ndue Shpani, e cila vetëm në Mat ka fituar projekte për rikonstruksionin e katër shkollave si dhe projektin “Parku Tematik” në Bulqizë.
Unaza e Burrelit është aktualisht e pa aksesueshme, edhe pse punimet për rikonstruksionin e kësaj unaze nisën dhe përfunduan vitin e kaluar. Unaza nuk u vendos në funksion të plotë për shkak të nisjes së dëmtimit nga reshjet e shirave në Tetor të vitit 2025.
Objekti mbeti i pakolauduar dhe i pa marrë në dorëzim. Rruga ka qenë vazhdimisht problematike përsa i përket shembjeve, ku që prej vitit 2010 ishte thuajse e pakalueshme për mjetet e tonazhit të rëndë./voxnews
