Kriza e Chelsea vazhdon të thellohet në Premier League, teksa londinezët pësuan humbjen e pestë radhazi pa arritur të shënojnë, këtë herë ndaj Brighton me rezultatin e thellë 3-0. Një paraqitje zhgënjyese në “Amex Stadium” ka vënë në pikëpyetje serioze objektivat e skuadrës për një vend në Champions League.
Skuadra e drejtuar nga Liam Rosenior u gjend në disavantazh që në minutën e tretë, kur Ferdi Kadioglu shënoi pas një situate kaotike në zonë. Chelsea nuk reagoi pothuajse fare, duke mbyllur pjesën e parë me vetëm një goditje në portë dhe pa asnjë ide të qartë në lojë.
Në pjesën e dytë, Brighton dyfishoi rezultatin në minutën e 56-të me Jack Hinshelwood, pas një aksioni të ndërtuar mirë dhe një tjetër gabimi në mbrojtjen e londinezëve. Në minutat shtesë, Danny Welbeck vulosi fitoren 3-0, duke thelluar edhe më shumë krizën e Chelsea.
Kjo humbje e rëndë e zbret Chelsea në vendin e gjashtë në renditje, ndërsa Brighton ngjitet mbi ta, duke përfituar nga forma e dobët e “Blues”. Enzo Fernandez, pavarësisht se mbajti shiritin e kapitenit, nuk arriti të bëjë diferencën, ndërsa trajneri Rosenior duket gjithnjë e më shumë pa zgjidhje për situatën.
