Chelsea ka pësuar një humbje të rëndë në Premier League, duke u mposhtur 3-0 nga Brentford në “Gtech Community Stadium”. Më shumë sesa rezultati, shqetësuese ishte paraqitja e “Bluve”, të cilët u shfaqën pa ide, pa ritëm dhe pothuajse të padëmshëm në fazën sulmuese.
Jaidon Anthony zhbllokoi ndeshjen në minutën e 61-të pas një goditjeje standarde, ndërsa Igor Thiago dyfishoi avantazhin pesë minuta para fundit. Fábio Carvalho vulosi rezultatin 3-0 në kohën shtesë, në një moment kur sektori i tifozëve të Chelsea kishte nisur të boshatisej.
Në qendër të kritikave përfundoi Xabi Alonso. Trajneri spanjoll nuk arriti të gjente zgjidhjen për një plan loje që nuk funksionoi që në fillim, ndërsa reagimi nga stoli erdhi shumë vonë. Edhe ndryshimi i skemës dhe aktivizimi i Acheampong, Quenda dhe më pas Estevão nuk ndryshuan dot rrjedhën e ndeshjes.
Chelsea ka marrë vetëm 7 pikë nga 15 të mundshme dhe ka pësuar 12 gola në pesë ndeshjet e para të kampionatit. Pas një vere ku klubi investoi mbi 400 milionë euro, problemet në lojë dhe mungesa e alternativave bindëse në sulm po shtojnë presionin mbi Xabi Alonson.
